Jeremias 40 - BIBLIA - traduson antigu in Krioulo

Jeremias fika ku Jedalias

¹ SIÑOR bin papia ku Jeremias dipus ku Nebuzaradan, kapiton di guarda, largal na Ramá. I ojal la maradu ku korentis, na metadi di tudu katibus di Jerusalen ku Judá ku na lebaduba pa katiberasku na Babilonia.

² Kapiton di guarda coma Jeremias, i falal: “SIÑOR bu Deus fala i na manda mal kontra e kau.

³ I manda ki mal; i fasi suma ki falaba, pabia bo peka kontra SIÑOR, bo ka obdisil. E ku manda es tudu bin sedu.

⁴ Gosi N na librau de korenti na bu mon. Si bu misti bai ku mi pa Babilonia, bin; N na toma konta di bo, ma si bu ka misti, disa. Jubi, tudu tera sta bu dianti; kau ku bu misti bai, bu pudi bai a vontadi.”

⁵ Suma ku Jeremias tarda pa ruspundi, kapiton di guarda falal: “Riba pa Jedalias, fiju di Aikan, fiju di Safan, ku rei di Babilonia pui suma gubernadur di prasas di Judá, bu fika ku el na metadi di pobu. O si bu misti bai pa kualker utru ladu, bu ta bai.” Kapiton di guarda dal kumida ku pursenti, i disal i bai.

⁶ Asin Jeremias bai pa Jedalias, fiju di Aikan, na Mizpá, i sinta ku el na metadi di pobu ku fikaba na ki tera.

Jedalias, gubernadur di Judá

⁷ Ŝefis di tropa di Judá, ku se omis ku staba na matu, e obi kuma rei di Babilonia pui Jedalias, fiju di Aikan, suma gubernadur di tera, kuma i ntregaduba omis, minjeris ku mininus, kilis mas koitadi di tera, ku ka lebaduba katibu pa Babilonia.

⁸ Ismael, fiju di Netanias, Joanan ku Jonatas, fijus di Kareá, Seraias, fiju di Tanumet, ku fijus di Efai, netofatita, ku Jezanias, fiju di un meakatita, elis ku se omis e bai pa Jedalias, na Mizpá.

⁹ Jedalias, fiju di Aikan, fiju di Safan, jurmenta pa elis ku se omis, i fala elis: “Ka bo ten medu di jinti di Babilonia; bo fika ne tera, bo sirbi rei di Babilonia; asin tudu na kuri bos diritu.

¹⁰ Ami N na sinta na Mizpá, pa sukuta ordi di jinti di Babilonia ku bin pa nos. Bo pudi junta biñu ku frutas ku azeiti, bo miti elis na jarus, bo sinta na prasas ku bo toma.”

¹¹ Oca ku tudu judeus ku staba na Moab, Amon, Edon ku tudu utru teras, obi kuma rei di Babilonia disa utru jinti na Judá, i pui Jedalias, fiju di Aikan, fiju di Safan, suma gubernadur riba delis,

¹² elis tudu e riba di tudu ki kaus ke pajigaduba nel, e bin pa tera di Judá, pa Jedalias na Mizpá. E junta manga di fruta ku biñu.

Jedalias matadu

¹³ Joanan, fiju di Kareá, ku tudu ŝefis di tropa ku staba na matu, e bai pa Jedalias na Mizpá,

¹⁴ e falal: “Bu ka sibi kuma Baalis, rei di fijus di Amon, i manda Ismael, fiju di Netanias, pa I matau?” Jedalias, fiju di Aikan, i ka fia.

¹⁵ Dipus Joanan, fiju di Kareá, i papia ku Jedalias na sigridu, na Mizpá, i falal: “Disan bai mata Ismael, fiju di Netanias, sin ningin ka sibi. Kuma ki na bin matau, pa tudu Judá ku sta juntu ku bo e bin pajigadu, jinti di Judá ku sobra pa e bin pirdi?”

¹⁶ Ma Jedalias, fiju di Aikan, i fala Joanan, fiju di Kareá: “Ka bu fasi asin, pabia kil ku bu na papia kontra Ismael i mintida.”