Jeremias 38 - BIBLIA - traduson antigu in Krioulo

Jeremias na fonti seku

¹ Sefatias, fiju di Matan, Jedalias, fiju di Pasur, Jeukal, fiju di Selemias, ku Pasur, fiju di Malkias, e obi palabras ku Jeremias na papiaba ku tudu pobu, i fala:

² “Asin ku SIÑOR fala: ‘Kil ku fika ne prasa i na muri di spada, fomi o duensa, ma kil ku sai pa jinti di Babilonia i na bibu, i na kapli ku si vida, i ka na muri.’

³ Asin ku SIÑOR fala: ‘E prasa, i ka na maina, i na ntregadu na mon di tropas di rei di Babilonia; el i na tomal.’ ”

⁴ Ŝefis fala rei: “Ki omi dibi di muri, pabia i na disanima omis di gera ku sobra ne prasa, ku tudu pobu, manera ki na fala elis ki palabras. Ki omi ka na buska ben de pobu, ma son mal.”

⁵ Rei Zedekias fala: “I sta na bo mon. Ami N ka pudi fasi nada kontra bos.”

⁶ Asin e toma Jeremias, e botal na fonti di Malkias, fiju di rei, ku staba na kintal di guarda. E rianta Jeremias ku kordas. I ka tenba yagu na fonti, son lama; Jeremias ntola na lama.

⁷ Ebed-Melek di Etiopia, un funsionariu di kasa di rei, i bin obi kuma e miti Jeremias na ki fonti. Rei staba sintadu na porton di Benjamin.

⁸ Ebed-Melek sai na palasiu, i bai pa rei, i falal:

⁹ “Ñu Rei, ki omis e fasi mal na tudu ke fasi ku anunsiadur Jeremias. E botal na fonti. I na muri la di fomi, pabia pon ka ten mas na prasa.”

¹⁰ Rei da ordi pa Ebed-Melek di Etiopia, i falal: “Leba trinta omi pa e tira anunsiadur Jeremias na fonti antis di i muri.”

¹¹ Asin Ebed-Melek toma ki omis, i bai pa kasa di rei, pa un kuartu bas di armazen di rikesa, i toma di la ratajus ku utru ropa beju, i rianta elis ku kordas pa Jeremias,

¹² i falal: “Pui e ratajus ku ropa beju bas di sabaku, pa ka korda molostau.” Jeremias fasi asin.

¹³ E junda Jeremias ku kordas, e tiral na fonti. Jeremias fika na kintal di guarda.

Zedekias pidi konsiju di Jeremias

¹⁴ Rei Zedekias manda tisi anunsiadur Jeremias na si dianti, na terseru entrada di kasa di SIÑOR, i falal: “N misti puntau un kusa; ka bu sukundin nada.”

¹⁵ Jeremias ruspundi Zedekias: “Si N bin kontau tudu, bu ka na matan? Si N dau konsiju, bu na obin?”

¹⁶ Rei Zedekias jurmenta pa Jeremias na sigridu, i falal: “N jurmenta pa vida di SIÑOR ku danu vida kuma N ka na matau, nin N ka na ntregau na mon di ki omis ku misti matau.”

¹⁷ Jeremias fala Zedekias: “Asin ku SIÑOR Deus ku ten tudu puder, Deus di Israel, fala: ‘Si bu sai, bu ntrega bu kabesa pa ŝefis di rei di Babilonia, bu ta bibu; e prasa i ka na kemadu ku fugu; abo ku bu familia bo ta bibu,

¹⁸ ma si bu ka ntrega bu kabesa pa ŝefis di rei di Babilonia, e prasa na ntregadu na mon di tropas di Babilonia; e na kemal ku fugu. Bu ka na kapli na se mon.’ ”

¹⁹ Rei Zedekias fala Jeremias: “N ten medu di judeus ku bai ja pa jinti di Babilonia, pabia kilas pudi ntregan na mon di ki judeus; e ta fasin mal.”

²⁰ Jeremias falal: “E ka na ntregau. Ten pasensa, obi palabra di SIÑOR, bu fasi ke ku N falau. Asin, kusas na kuriu diritu; bu na salba bu vida.

²¹ Si bu nega ntrega bu kabesa, es i palabra ku SIÑOR mostran:

²² Tudu minjeris ku fika na kasa di rei di Judá e na lebadu pa ŝefis di rei di Babilonia. E na falau: “‘Kil bu amigus ku bu fiansaba nelis e nganau, e ngañau. Gosi bu pe ntola na lama; bu amigus bandonau.’

²³ “Asin tudu bu minjeris ku bu fijus na lebadu pa jinti di Babilonia. Abo bu ka na kapli na se mon, ma bu na sta prezu na mon di rei di Babilonia ku na kema e prasa ku fugu.”

²⁴ Zedekias fala Jeremias: “Ka bu disa ningin sibi de kombersa; asin bu ka ta muri.

²⁵ Ora ku ŝefis obi kuma N papia ku bo, e na bin pa bo, e na falau: ‘Kontanu ke ku bu fala rei, ku ke ku rei falau. Ka bu sukundinu nada pa ka no matau.’

²⁶ Bu ta fala elis: ‘N fasi ña pididu dianti di rei pa ka i tornan na kasa di Jonatas, pa ka N bai muri la.’ ”

²⁷ Dipus, tudu ŝefis bin pa Jeremias, e puntal. Jeremias ruspundi elis konformi tudu palabras ku rei dal ordi pa i fala. E disal, pabia ningin ka obiba si kombersa ku rei.

²⁸ Jeremias fika na kintal di guarda te na dia ku Jerusalen tomadu.