Jeremias 37 - BIBLIA - traduson antigu in Krioulo

Jeremias na kalabus

¹ Nabukodonosor, rei di Babilonia, i pui Zedekias, fiju di Josias, pa i sedu rei di Judá. I rena na lugar di Konias, fiju di Jeoiakin.

² El, ku si ŝefis, ku pobu di tera, e ka para sintidu na palabras di SIÑOR ki fala na boka di anunsiadur Jeremias.

³ Rei Zedekias manda Jeukal, fiju di Selemias, ku saserdoti Sofonias, fiju di Maaseias, pa anunsiadur Jeremias, pa e falal: “Roga SIÑOR no Deus pa nos.”

⁴ Jeremias staba libri pa yanda na metadi di pobu, pabia e ka ficalba inda na kalabus.

⁵ Tropas di Faraó sai na Ejitu. Oca tropas di Babilonia, ku na tajaba Jerusalen, obi ki noba, e rakua.

⁶ SIÑOR bin papia ku anunsiadur Jeremias, i dal e rekadu pa konta ki jinti:

⁷ “Ami, SIÑOR Deus di Israel, N fala: Asin ku bo na konta rei di Judá ku manda bos pa buska sibi ke ku na sedu: ‘Tropas di Faraó ku sai pa juda bos e na riba pa se tera, ku sedu Ejitu.

⁸ Tropas di Babilonia na riba, e na geria kontra e prasa, e na tomal, e kemal ku fugu.

⁹ Ami, SIÑOR, N fala: Ka bo ngana bo kabesa, bo fala kuma, sin duvida jinti di Babilonia na disa bos, e bai, pabia e ka na bai.

¹⁰ Nin si bo ngaña tudu tropas di Babilonia ku na geria kontra bos tok i sobra son puku omis ku molosta, kada un delis i ta lanta na si tenda, i kema e prasa ku fugu.’ ”

¹¹ Oca ku tropas di Babilonia rakua di Jerusalen pabia di tropas di Faraó,

¹² Jeremias sai na Jerusalen ku ideia di bai pa tera di Benjamin, pa toma si parti di yardansa na metadi di pobu.

¹³ Oca ki ciga na porton di Benjamin, un kapiton di guarda ku staba la, ku tene nomi di Jerias, fiju di Selemias, fiju di Ananias, i prindi anunsiadur Jeremias, i falal: “Bu na kuri pa jinti di Babilonia!”

¹⁴ Jeremias falal: “I ka bardadi, N ka na kuri pa elis.” Jerias ka seta obi; i prindi Jeremias, i lebal pa ŝefis.

¹⁵ Ŝefis paña raiba di Jeremias, e manda sutal, e mitil na kalabus, na kasa di sekretariu Jonatas, pabia e bidanta si kasa kalabus.

¹⁶ Jeremias yentra na un kuartu pikininu bas di con, i fika la manga di dia.

¹⁷ Dipus rei Zedekias manda tisil pa si kasa, i puntal na sigridu: “I ten palabra di SIÑOR?” Jeremias ruspundil: “I ten. Bu na ntregadu na mon di rei di Babilonia.”

¹⁸ Dipus Jeremias punta rei Zedekias: “Kal mal ku N fasi kontra bo, o kontra bu ŝefis, o kontra pobu, ku manda bu fican na kalabus?

¹⁹ Nunde bu anunsiaduris ku anunsiaba pa bos, e fala kuma rei di Babilonia ka na bin kontra bos nin kontra e tera?

²⁰ Gosi, Ñu Rei, ten pasensa bu obi ña pididu. Ka bu ribantan na kasa di sekretariu Jonatas, pa ka N bin muri la.”

²¹ Asin rei Zedekias da ordi pa e pui Jeremias na kintal di guarda. E dal un pon kada dia di rua di paderus, tok pon kaba tudu na prasa. Jeremias fika la na kintal di guarda.