Jeremias 36 - BIBLIA - traduson antigu in Krioulo

Baruk lei libru na templu

¹ Na kuartu anu di Jeoiakin, fiju di Josias, rei di Judá, SIÑOR bin papia ku Jeremias, i falal:

² “Toma un rolu, bu skirbi nel tudu palabras ku N falau aserka di Israel, Judá ku tudu nasons, disna di dia ku N kumsa na papia ku bo na tempu di Josias, te aos.

³ Si pobu di Judá obi tudu mal ku N pensa fasi elis, talves e ta konverti, kada kin di si mau manera di yanda; N ta purda elis se maldadi ku pekadu.”

⁴ Jeremias coma Baruk, fiju di Nerias. Baruk skirbi na rolu konformi Jeremias na papia tudu palabras ku SIÑOR mostralba.

⁵ Jeremias fala Baruk: “Ami N tujidu yentra na kasa di SIÑOR.

⁶ Yentra abo ku rolu ku bu skirbi nel tudu palabras ku N falau, bu leil na oreja di pobu, na kasa di SIÑOR, na dia di junjun. Tambi bu na leil dianti di tudu Judá ku bin di se prasas.

⁷ I pudi sedu ku e ta pidi SIÑOR, kada kin ta konverti di si mau manera di yanda, pabia SIÑOR ten raiba garandi ku na yardi kontra e pobu.”

⁸ Baruk, fiju di Nerias, i fasi tudu ku anunsiadur Jeremias falal pa i fasi; na kasa di SIÑOR i lei palabras di SIÑOR na ki libru.

⁹ Na nonu mis di kintu anu di Jeoiakin, fiju di Josias, rei di Judá, i anunsiadu junjun dianti di SIÑOR pa tudu pobu na Jerusalen, ku tudu jinti ku bin di prasas di Judá.

¹⁰ Baruk lei palabras di Jeremias na ki libru dianti di tudu pobu na kasa di SIÑOR. I staba na kuartu di Jemarias, fiju di Safan, sekretariu, na kintal di riba, na entrada di porton nobu di kasa di SIÑOR.

Libru leidu pa ŝefis

¹¹ Oca ku Mikaias, fiju di Jemarias, fiju di Safan, obi tudu palabras di SIÑOR na ki libru,

¹² i bai pa kasa di rei, pa kuartu di sekretariu, i oja tudu ŝefis sintadu la, ku sedu sekretariu Elisama, Delaias, fiju di Semaias, Elnatan, fiju di Akbor, Jemarias, fiju di Safan, ku Zedekias, fiju di Ananias, ku tudu utru ŝefis.

¹³ Mikaias konta elis tudu palabras ki obiba oca ku Baruk lei na libru dianti di pobu.

¹⁴ Tudu ŝefis manda Jeudi, fiju di Netanias, fiju di Selemias, fiju di Kusi, pa i fala Baruk: “Ki rolu ku bu lei dianti di pobu, tomal bu tisi.” Baruk, fiju di Nerias, toma libru, i bai pa elis.

¹⁵ E falal: “Sinta, bu lei pa nos.” Baruk lei se dianti.

¹⁶ Oca ke obi tudu ki palabras, e jubi ŋutru ku medu, e fala Baruk: “I ka ten utru kusa; no na konta tudu e palabra pa rei.”

¹⁷ E punta Baruk: “Kuma ku bu yanda bu skirbi e kusas? I ka Jeremias ku kontau el pa bu skirbi?”

¹⁸ Baruk fala elis: “Sin, i el ku kontan kada palabra; ami N fika N na skirbil na libru ku tinta.”

¹⁹ Ŝefis fala Baruk: “Bai bu sukundi, abo ku Jeremias, pa ka ningin sibi nunde ku bo sta nel.”

Rei kema libru

²⁰ Ŝefis fika ki rolu na kuartu di sekretariu Elisama, e bai pa rei na kintal, e kontal tudu ki palabras.

²¹ Rei manda Jeudi pa i tisi rolu. Jeudi tomal na kuartu di sekretariu Elisama, i leil dianti di rei ku tudu ŝefis ku staba ku el.

²² Suma i staba na nonu mis, rei staba sintadu na kasa ki ta usaba na tempu di friu, ku fugu na fugareru si dianti.

²³ Oca ku Jeudi lei tris o kuatru kulunas di rolu, rei kortal ku faka di sekretariu, i botal na fugu. I fika i na fasi asin tok i kaba kema rolu tudu na ki fugu.

²⁴ Rei ku tudu si ŝefis ku obi tudu ki palabras e ka tenba nin medu, nin e ka rumpi se ropa.

²⁵ Mesmu ku Elnatan, Delaias ku Jemarias e pidi rei pa ka i kema rolu, i ka seta obi elis.

²⁶ Rei da ordi pa Jerameel, fiju di Amelek, Seraias, fiju di Azriel, ku Selemias, fiju di Abdeel, pa e bai prindi ki sekretariu Baruk ku anunsiadur Jeremias, ma SIÑOR sukundiba elis.

Baruk skirbi utru libru

²⁷ Dipus ku rei kema rolu ku teneba palabras ku Baruk skirbiba di boka di Jeremias, SIÑOR bin papia ku Jeremias, i falal:

²⁸ “Toma utru rolu, bu skirbi nel tudu palabras ku staba na ki purmeru libru ku Jeoiakin, rei di Judá, kema.

²⁹ Fala Jeoiakin, rei di Judá, kuma asin ku SIÑOR fala: ‘Abo bu kema ki rolu, bu punta: “Ke ku manda bu skirbi nel kuma, na bardadi, rei di Babilonia na bin, i na dana e tera, i na kaba ku omis ku limarias ku sta nel?”

³⁰ Pabia di kila ami, SIÑOR, N fala aserka di Jeoiakin, rei di Judá: I ka na ten na si jorson kin ku na sinta na tronu di Davi. Si difuntu na botadu na kalur di dia ku jelu di noti.

³¹ N na kastigal, ku si fijus, ku si ŝefis, pabia di se pekadu. N na tisi riba del, ku moraduris di Jerusalen, ku omis di Judá, tudu ki mal ku N papia kontra elis, pabia e ka obdisin.’ ”

³² Asin Jeremias toma utru rolu, i da sekretariu Baruk, fiju di Nerias; Baruk skirbi nel, di boka di Jeremias, tudu palabras di libru ku Jeoiakin, rei di Judá, kemaba na fugu, tok i buri utru palabras parsidu.