Jeremias 30 - BIBLIA - traduson antigu in Krioulo

Pobu di Israel na riba pa se tera

¹ SIÑOR bin papia ku Jeremias, i falal

² kuma SIÑOR, Deus di Israel, fala: “Skirbi na libru tudu palabras ku N falau.

³ Ami, SIÑOR, N fala kuma, tempu na ciga ku N na tisi ña pobu Israel ku Judá di katiberasku, N na ribanta elis na tera ku N da se papes pa e tenel.” Asin ku SIÑOR fala.

⁴ Es i palabras ku SIÑOR papia aserka di Israel ku Judá.

⁵ Asin ku SIÑOR fala: “No obi vos di garandi medu — di medu; i ka di pas.

⁶ Punta, bu jubi si un omi pudi tene dur di partu. Ke ku manda N na oja kada omi ku mons riba di si bariga suma minjer ku na padi? Kuma ku se rostus bida brankasenti?

⁷ Ki dia na sedu dia meduñu; i ka na ten utru dia ku parsi ku el! I na sedu tempu di foronta pa Jakó, ma i na libradu del.

⁸ “Ami, SIÑOR ku ten tudu puder, N fala: Na ki dia N na tira se korenti na bu garganti, N kebral; N na sapa bu kordas. Nunka mas bu ka na sedu katibu di stranjerus.

⁹ Bo na sirbi SIÑOR bo Deus, bo sirbi tambi Davi, bo rei, ku N na lantanda pa bos.

¹⁰ “Asin, ña servu Jakó, ka bu medi; Israel, ka bu panta. Ami, SIÑOR, N fala kuma N na librau di tera lunju, N na libra bu jorson di tera di se katiberasku. Jakó na riba, i na fika ketu ku susegu; i ka na ten kin ku na pantandal.

¹¹ Ami, SIÑOR, N fala kuma N sta ku bo; N na librau. N na kaba ku tudu nasons ku N pajigau na se metadi, ma N ka na kaba ku bo. N ka na disau kapli di kastigu, ma N na kastigau ku midida justu.”

¹² Asin ku SIÑOR fala: “Bu caga ka ten kura; kau ku bu molosta i ta deu dimas.

¹³ I ka ten kin ku na difindi pa bo; i ka ten mesiñu pa bu caga; i ka ten kura pa bo.

¹⁴ Bu amantis tudu diskisi di bo, nin e ka ta punta pa bo. N sutau suma ku bu inimigu pudi fasi; N kastigau suma ku algin mau ta fasi, pabia di bu maldadi garandi ku bu manga di pekadu.

¹⁵ Ke ku manda bu ta grita pabia di bu caga? Bu dur ka pudi kuradu. N fasi e kusas pabia di bu maldadi garandi, ku bu manga di pekadu.

¹⁶ “Ma tudu kilis ku nguliu e na ngulidu. Tudu bu inimigus na lebadu pa katiberasku. Kilis ku furta bu kusas, N na ntrega elis pa se kusas furtadu tambi.

¹⁷ N na tornau bu saudi, N na kurau bu cagas, mesmu ke comau bandonadu, e fala: ‘I Sion; ningin ka ta mporta ku el!’ ” Asin ku SIÑOR fala.

¹⁸ SIÑOR fala mas: “N na kaba ku katiberasku di familias di Jakó; N na sinti pena di se moradas. Jerusalen na torna kumpudu riba di si alisersu ku danaduba; palasiu na torna firma na si kau.

¹⁹ Jinti na kanta pa ngaba Deus, e na mostra se kontentamentu. N na buri elis; e ka na menusadu. N na da elis rispitu; e ka na njutidu.

²⁰ Se fijus na sedu suma na tempu antigu; se kumunidadi na firma ña dianti. N na kastiga tudu kilis ku kalka elis.

²¹ Se ŝef ku na bin guberna elis i na sedu un delis ku na lanta na se metadi; N na kumbidal pa i bin; i na ciga pertu di mi. Kin ku na osa ciga pa mi ku si propi forsa?” Asin ku SIÑOR punta.

²² “Asin bo na sedu ña pobu; N na sedu bo Deus.”

²³ Es i turbada di SIÑOR; si raiba sai suma urdumuñu ku na turmenta riba di kabesa di jinti mau.

²⁴ Raiba garandi di SIÑOR ka na kalma tok i kaba fasi tudu ki tene na si sintidu. Na dias ku na bin bo na bin ntindi e kusa.