Jeremias 27 - BIBLIA - traduson antigu in Krioulo

Jeremias pui kanga

¹ Na kumsada di renansa di Zedekias, fiju di Josias, rei di Judá, SIÑOR bin papia ku mi, Jeremias,

² i falan asin: “Toma madera ku kordas di kuru, bu kumpu kanga, bu pul na bu garganti.

³ Manda rekadu pa reis di Edon, di Moab, Amon, Tiru ku Sidon, na mon di ki jinti ke manda pa Jerusalen pa e papia ku Zedekias, rei di Judá.

⁴ Da elis un rekadu pa se mestres, bu fala kuma asin ku SIÑOR ku ten tudu puder, Deus di Israel, fala: ‘Bo bai konta bo mestres:

⁵ “Ku ña garandi puder ku ña brasu forti N kumpu mundu, ku omis ku limarias ku sta nel; N ta dal pa kin ku N misti.

⁶ Gosi N na ntrega tudu bo tera na mon di ña servu Nabukodonosor, rei di Babilonia; tambi N dal limarias di matu pa e sirbil.

⁷ Tudu nasons na sirbil, ku si fiju ku si netu, tok i ciga tambi tempu di si tera, ora ku manga di nason ku reis garandi na fasil se katibu.

⁸ “ ‘ “Ma si kualker nason o renu nega sirbi Nabukodonosor, rei di Babilonia, i ka pui si garganti bas di si kanga, N na kastiga ki nason ku spada, fomi ku duensa, tok N kaba ku elis pa mon di Nabukodonosor.

⁹ Ka bo para sintidu pa bo anunsiaduris, nin diviñaduris, suñaduris, pauterus o jambakusis, ku ta fala bos kuma bo ka na sirbi rei di Babilonia.

¹⁰ E ta anunsia bos mintida, ku na pui bo mandadu lunju di bo tera; ami N na serka bos nel; bo na pirdi.

¹¹ Nason ku miti si garganti bas di kanga di rei di Babilonia, i sirbil, N na disa elis na se tera; e na labral, e sinta nel. Asin ku SIÑOR fala.” ’ ”

¹² N papia ku Zedekias, rei di Judá, N kontal tudu ki palabras, N falal: “Bo miti bo garganti na kanga di rei di Babilonia, bo sirbil ku si pobu; bo ta bibu.

¹³ Ke ku manda bu misti muri, abo ku bu pobu, ku spada, fomi o duensa? Asin ku SIÑOR fala i na sedu ku nason ku ka sirbi rei di Babilonia.

¹⁴ Ka bo para sintidu na palabras di anunsiaduris ku ta fala bos kuma bo ka na sirbi rei di Babilonia, pabia i mintida ke na anunsia bos.

¹⁵ SIÑOR fala: ‘N ka manda elis. E na anunsia mintida na ña nomi. Asin, N na serka bos, bo na pirdi, abos ku kilis ku na anunsia pa bos.’ ”

¹⁶ N papia tambi ku saserdotis ku tudu pobu, N fala elis kuma asin ku SIÑOR fala: “Ka bo pui sintidu na palabras di bo anunsiaduris ku fala kuma i ka na tarda, ki rikesas di kasa di SIÑOR na ribantadu di Babilonia. I mintida ke na konta bos.

¹⁷ Ka bo sukuta elis. Bo sirbi rei di Babilonia, bo ta bibu. Kuma ku bo na disa e prasa pa i bida lala?

¹⁸ Si kontra e sedu anunsiaduris, si palabra di SIÑOR sta ku elis, e ta ora pa SIÑOR ku ten tudu puder, pa ki rikesa ku fika na kasa di SIÑOR, kasa di rei di Judá, ku na Jerusalen, pa ka i lebadu pa Babilonia.

¹⁹ SIÑOR ku ten tudu puder papia aserka di kulunas, bañera, stantis movel ku utru mobilia ku fika na prasa,

²⁰ ku Nabukodonosor, rei di Babilonia, ka leba, oca ki leba Jekonias, fiju di Jeoiakin, rei di Judá, di Jerusalen pa Babilonia, tudu ku jinti garandi di Jerusalen.

²¹ Es ku SIÑOR ku ten tudu puder, Deus di Israel, fala aserka di rikesa ku fika na kasa di SIÑOR, na kasa di rei di Judá ku na Jerusalen:

²² ‘I na lebadu pa Babilonia, i na fika la te na dia ku N bai pa el. Dipus, N na ribantal, N tornal pa e kau.’ Asin ku SIÑOR fala.”