Jeremias 19 - BIBLIA - traduson antigu in Krioulo

Puti kebradu

¹ SIÑOR falan: “Bai pa kumpudur di puti, bu kumpra un puti. Leba garandis di pobu ku bo, ku garandis di saserdotis,

² bo sai pa kobon di fiju di Inon ku sta na entrada di porton di sol. Konta la palabras ku N dau,

³ bu fala: ‘Abos reis di Judá ku pobu di Jerusalen, bo obi palabra di SIÑOR. Asin ku SIÑOR ku ten tudu puder, Deus di Israel, fala: Jubi, N na tisi un garandi mal riba de kau, ku tudu algin ku obil, si oreja na pupa.

⁴ N na fasi asin pabia e disan, e kontamina e kau, e kema nsensu pa utru deusis ku nunka e ka kunsi, nin elis nin se papes nin reis di Judá; e inci e kau ku sangi di jinti ku ka ten kulpa.

⁵ E kumpu kaus altu pa Baal, pa kema se fijus na fugu suma oferta kemadu pa Baal, kusa ku nunka N ka manda elis, nin pa N papia del, ku fadi pa i ciga na ña kabesa.

⁶ E ku manda tempu na ciga ku e kau ka na comadu mas Tofet, nin kobon di fiju di Inon, ma i na comadu kobon di matansa. Asin ku ami, SIÑOR, N fala.

⁷ “‘Ne kau N na dana planus di Judá ku Jerusalen. N na pui elis kai ku spada dianti di se inimigus, pa mon di kilis ku na buska mata elis. N na da se difuntus pa e sedu kumida pa kacus ku limarias di matu.

⁸ N na pui e prasa pa i sedu un spantu di trosa. Tudu kilis ku pasa nel e na panta, e subia, pabia di tudu si cagas.

⁹ N na pui jinti de prasa pa e kume karni di se fijus macu ku femia; kada kin na kume karni di si kumpañer, na ki tempu ke tajadu, e foronta pabia di se inimigus ku na buska mata elis.’

¹⁰ “Dipus bu na kebra ki puti na uju di kilis ku bai ku bo,

¹¹ bu na fala elis: ‘Asin ku SIÑOR ku ten tudu puder fala: N na kebra e pobu ku e prasa suma ku e puti kebra, i ka na pudi kumpudu mas. Elis e na ntera se mortus na Tofet, pabia i ka na ten utru lugar pa ntera elis.

¹² Asin ku ami, SIÑOR, N na fasi ku e lugar, ku si moraduris. N na fasi e prasa suma Tofet.

¹³ Kasas di Jerusalen ku kasas di reis di Judá e na sedu impuru suma Tofet, suma tambi tudu kasas nunde ke kema se nsensu riba di kasa pa sol ku lua ku strelas, e pursenta ofertas di bibida pa utru deusis.’ ”

¹⁴ Jeremias riba di Tofet, kau ku SIÑOR mandalba pa i anunsia, i bai firma na kintal di kasa di SIÑOR, i fala pobu:

¹⁵ “Asin ku SIÑOR ku ten tudu puder, Deus di Israel, fala: ‘N na tisi riba de prasa, ku tabankas na si roda, tudu mal ku N anunsia kontra el, pabia e ndurusi se korson, e nega obi ña palabras.’ ”