Jeremias 16 - BIBLIA - traduson antigu in Krioulo

Ordis ku SIÑOR da Jeremias

¹ SIÑOR bin papia ku mi, i falan:

² “Ka bu kasa, nin ka bu padi fijus ne kau.

³ Asin ku SIÑOR fala aserka di fijus macu ku femia ku padidu ne kau, aserka di se mames ku papes ku padi elis ne tera:

⁴ E na muri di duensa mau; jinti ka na cora elis, nin e ka na nteradu, ma e na sedu suma strumu na con. Spada ku fomi na kaba ku elis; se difuntus na sedu kumida pa kacus ku limarias di matu.

⁵ “Ami, SIÑOR, N fala: Ka bu yentra na kasa di cur, nin ka bu miskiña pa elis, ku fadi pa bu ten pena delis, pabia N tira ña pas de pobu, ku ña bondadi ku miserikordia.

⁶ Rikus ku koitadis na muri ne tera; e ka na nteradu; ningin ka na cora elis, nin laña kurpu nin rapa kabelu pa elis.

⁷ Ningin ka na da kumida pa kil ku sta na cur, nin e ka na dadu di bibi pa konsola elis pabia di mortu, nin si i di pape o mame.

⁸ “Ka bu yentra na kasa di festa pa sinta ku elis pa kume, pa bibi,

⁹ pabia asin ku ami, SIÑOR ku ten tudu puder, Deus di Israel, N fala: Ne lugar, na bo tempu, dianti di bo uju, N na kaba ku baruju di kontentamentu ku pas, ku kantiga di noivu ku noiva.

¹⁰ “Ora ku bu konta pobu tudu e palabra, e na puntau: ‘Ke ku manda SIÑOR na ameasanu ku tudu e garandi mal? Kal mal ku no fasi? Kal pekadu ku no fasi kontra SIÑOR no Deus?’

¹¹ Bu ta ruspundi elis kuma SIÑOR fala: ‘I pabia bo papes disan, e bai tras di utru deusis, e sirbi elis, e mpina se dianti, ma ami, e disan, e ka obdisi ña lei.

¹² Abos tambi, bo fasi pior di ki bo papes, pabia kada un di bos na yanda konformi duresa di si korson mau; bo ka para sintidu pa obin.

¹³ Asin N na tira bos fora de tera pa tera ku nin abos nin bo papes ka kunsi. La bo na sirbi utru deusis di dia ku di noti, pabia N ka na mostra bos fabur.’ ”

¹⁴ SIÑOR fala: “Tempu na ciga ku nunka mas jinti ka na fala: ‘N jurmenta pa vida di SIÑOR ku tira fijus di Israel na tera di Ejitu,’

¹⁵ ma e na fala: ‘N jurmenta pa vida di SIÑOR ku tisi Israel di tera di norti, ku tudu tera nunde ki pajiga elis nel.’ N na pui elis pa e riba pa tera ku N da se papes.”

¹⁶ SIÑOR fala: “Gosi N na manda manga di piskadur ku na bin piska elis. Dipus N na manda manga di montiadur ku na bin montia elis riba di montis pikininu ku garandi, te na kobas di pedras.

¹⁷ Ña uju sta riba di tudu se kamiñus. Ningin ka pudi sukundi di mi, nin pa kubri si pekadu pa N ka ojal.

¹⁸ N na kastiga elis dus bias pa se maldadi ku pekadu, pabia e kontamina ña tera ku se idulus nujenti ku ka tene vida, e inci tera di ña yardansa ku kusas nujenti.”

Jeremias pui si fiansa na Deus

¹⁹ O SIÑOR, ña forsa, ña difesa, ña kau di sukundi na dia di foronta, nasons na bin pa bo di utru ladus di mundu, e na fala: “No papes yardaba son mintida, idulus ku ka bali, ku ka ten purbitu.

²⁰ Nta un omi pudi kumpu deusis pa si kabesa? Sin, ma e ka na sedu deusis!”

²¹ SIÑOR fala: “N na nsina elis. E bias N na pui elis kunsi ña forsa ku ña puder; e na sibi kuma ña nomi i SIÑOR.”