Jeremias 10 - BIBLIA - traduson antigu in Krioulo

Deus ku idulus

¹ Pobu di Israel, bo obi palabra ku SIÑOR na papia ku bos.

² Asin ku SIÑOR fala: “Ka bo remenda manera di yanda di utru nasons; ka bo panta ku sinalis di seu ku utru nasons ta panta ku el,

³ pabia kustumus di nasons ka bali. E ta korta po na matu; omi ku ten jitu i ta labral ku furmon.

⁴ Jinti ta fajal ku uru ku prata; e ta fiksal ku martel ku pregus pa i pudi firma diritu sin kai.

⁵ Ki idulus, e sedu suma un spantaliu; e ka pudi papia, e pirsisa di algin pa lambu elis, pabia e ka pudi yanda. Ka bo ten medu delis, pabia e ka pudi fasi mal, nin e ka ten forsa pa fasi ben.”

⁶ O SIÑOR, i ka ten ningin suma bo; abo i garandi; puder di bu nomi i garandi dimas.

⁷ O Rei di nasons, kin ku ka dibi di ten medu di bo? I abo son ku mersi rispitu. I ka ten ningin suma bo na metadi di tudu jirus di nasons, o na tudu se renus.

⁸ Ma elis tudu e stupidu, e tulu; Se nsinamentu bin di idulus di po ku ka bali.

⁹ E tisi prata di Tarsis, ku uru di Ufaz; jinti ku sibi tarbaja ku prata ku uru e kumpu idulus ku ta bistidu ku fazenda azul ku purpura, tisidu pa algin ku sibi fasil.

¹⁰ Ma SIÑOR i Deus di bardadi; el i Deus bibu, Rei pa sempri. Si i paña raiba, con ta tirmi; nasons ka pudi nguenta si raiba.

¹¹ Bo fala elis asin: “Deusis ku ka kumpu seu ku tera e na pirdi ne mundu ku sta bas di seu.”

Kantiga di ngaba Deus

¹² Deus kumpu tera ku si puder; i pui mundu na si lugar ku si jiresa; ku si ntindimentu i distindi seus.

¹³ Si i papia risu, i ta ten baruju di yagu na seu. Yagu di nuven ta lanta na tudu parti di mundu; i ta manda relampagu ku cuba; i ta pui bentu pa i sai na si armazen.

¹⁴ Tudu jinti torna stupidu, e ka sibi nada. Tudu kilis ku ta tarbaja na uru e ta fika ku borgoña pa imaẑens ke kumpu, pabia e sedu mintida; i ka ten folgu nelis.

¹⁵ Elis e ka bali; e dibi di njutidu. Ora ku se julgamentu ciga, e na kabadu ku el.

¹⁶ Deus di Jakó ka sta suma elis, pabia el i Kumpudur di tudu kusa. Israel sedu jorson di si yardansa. Si nomi i SIÑOR ku ten tudu puder.

Judá danadu

¹⁷ Abos ku mora na prasa tajadu, bo junta bo kusas,

¹⁸ pabia asin ku SIÑOR fala: “N na bota fora moraduris di tera, N na foronta elis tok e sinti.”

¹⁹ Ai di mi pabia di ña molostu! Ña caga na fasin dur dimas! N fala ña kabesa: “Es i ña duensa; N ten ku nguental.”

²⁰ Ña tenda danadu; ña kordas tudu sapadu. Ña fijus bai, e ka sta ja. Ningin ka ten ku na yarma ña tenda, i firmanta ña lona.

²¹ Ŝefis bida tulu, e ka punta SIÑOR. Asin, kusas ka kuri elis diritu; tudu se pobu pajiga.

²² Bo obi! Nobas na bin di garandi kunfuson na tera di norti. E na fasi prasas di Judá suma lala, morada di kacur brabu.

²³ O SIÑOR, N sibi kuma vida di omi i ka di sil; i ka pudi gia si pasus.

²⁴ Kuriẑin, SIÑOR, ma na midida justadu; i ka ku raiba, pa ka bu kaba ku mi.

²⁵ Darma bu raiba riba di nasons ku ka setau, ku rasas ku ka ta coma bu nomi, pabia e nguli Jakó tok e kaba ku el; e dana si tera.