Isaias 65 - BIBLIA - traduson antigu in Krioulo

Julgamentu ku salbason

¹ SIÑOR fala: “N parsi pa kilis ku ka punta pa mi; kilis ku ka buskan, e ojan. N papia ku un nason ku ka ta comaba ña nomi, N fala: ‘Alin li, alin li.’

² Tudu dia N distindi ña mon pa un pobu rebeldi, ku ta yanda na kamiñu ki ka bon, ku na fasi konformi se propi pensamentus,

³ un pobu ku ta fasi kusas sempri ña dianti pa pun N paña raiba. E ta fasi sakrifisius na jardins, e ta kema nsensu riba di altaris di tiẑolu.

⁴ E ta sinta na simiterius, e pasa noti na lugaris di difuntus. E ta kume karni di purku; na se pratu e tene kaldu di karni nujenti.

⁵ E ta fala: ‘Fika la; ka bu ciga nunde mi, pabia N sedu mas sagradu di ki bo!’ Jinti suma es e sedu na ña naris suma fumu di fugu ku ta yardi tudu dia.

⁶ “Jubi, i sta skritu ña dianti; N ka na kala, ma N na paga; N na torna vingansa tudu

⁷ pa bo pekadus, tudu ku pekadus di bo papes, ku kema nsensu na montañas, e koban na montis pikininu. E ku manda N na midi pa paga elis konformi ki kusas ke tarda fasi.” I SIÑOR ku fala.

⁸ SIÑOR fala mas: “Ora ki ojadu inda sumu na kacu di uvas, jinti ta fala: ‘Ka bu danal; i tene kusa bon nel inda.’ Asin ku N na fasi pa amor di ña servus, N ka na kaba ku elis tudu.

⁹ N na da fijus pa jorson di Jakó, N na lantanda algin na Judá ku na yarda ña montis; kilis ku N kuji na yarda tera; ña servus na mora la.

¹⁰ Saron na sedu lugar di bakia karnel; kobon di Akor na sedu kau di diskansu pa bakas ku pertensi ña pobu ku buskan.

¹¹ “Ma abos ku lunjusi di SIÑOR, ku diskisi di ña monti sagradu, ku ta purpara mesa pa deus Fortuna, ku ta mistura biñu pa deus Distinu,

¹² N na distina bos pa bo muri ku spada; abos tudu bo na mpina pa matadu, pabia N coma, bo ka kudi; N papia, bo ka obi, ma bo fasi mal ña dianti; bo kuji kil ku N ka ta kontenti ku el.”

¹³ E ku manda SIÑOR Deus fala: “Jubi, ña servus na kume, ma abos bo na sufri fomi; ña servus na bibi, ma abos bo na tene sedi; ña servus na kontenti, ma abos bo na pasa borgoña.

¹⁴ Ali ña servus na kanta ku kontentamentu di korson, ma abos, bo na grita ku tristesa di korson, bo na pupa, kebrantadu na spiritu.

¹⁵ Bo na disa bo nomi suma maldison pa kilis ku N kuji. SIÑOR Deus na mata bos, ma i na da si servus utru nomi.

¹⁶ Algin na tera ku pidi benson, Deus di bardadi na bensual; kil ku jurmenta na tera, i na jurmenta na nomi di Deus di bardadi, pabia malis ku pasa i diskisidu ja, i sta sukundidu di ña uju.

Nobu seu ku nobu tera

¹⁷ “Jubi, N na kumpu nobu seu ku nobu tera; kusas ku pasa ka na lembradu, nin e ka na bin na kabesa di algin.

¹⁸ Bo na kontenti, bo kanta ku alegria tudu ora pabia di kil ku N kumpu, pabia Jerusalen ku N kumpu na inci ku alegria; si pobu na kontenti.

¹⁹ N na sta alegri pabia di Jerusalen, N na sinti kontentamentu ku ña pobu. Nunka mas i ka na obidu nel vos di cur nin di tristesa.

²⁰ “I ka na ten nel mininu ku na muri ku puku dias, nin beju ku ka ciga na si tempu, pabia kil ku muri ku sen anu, el i nobu inda. Algin ku ka yangasa sen anu, jinti na fala i maldisuadu.

²¹ E na kumpu kasas, e mora nel; e na paranta ortas di uva, e na kume se fruta.

²² E ka na kumpu kasas pa utrus mora la, nin e ka na paranta pa utrus kume, pabia dias di ña pobu na sedu suma dias di arvuri; kilis ku N kuji, e na goza rusultadu di tarbaju di se mon te na se bejisa.

²³ E ka na tarbaja amonton, nin e ka na padi fijus pa sufrimentu, pabia e na sedu un pobu ku SIÑOR bensua, elis ku se jorson di futuru.

²⁴ Antis de coma, N na kudi; nkuantu e na papia inda, N na obi.

²⁵ Lubu ku fiju di karnel na kume paja juntu; lion na kume paja suma baka, ma puera na sedu kumida di serpenti. E ka na fasi mal nin e ka na dana nada na tudu ña monti sagradu.” Asin ku SIÑOR fala.