Isaias 40 - BIBLIA - traduson antigu in Krioulo

Speransa pa pobu di Israel

¹ Bo Deus fala: “Bo konsola ña pobu, bo konsola elis.

² Bo papia ku bondadi pa Jerusalen, bo kontal klaru kuma kastigu di si maldadi i kaba ja, kuma pres di mal ki fasi i pagadu ja; tambi i risibi di mon di SIÑOR dus bias mas pa tudu si pekadu.”

³ Algin na grita: “Bo purpara kamiñu pa SIÑOR na lala; bo filanta un strada la pa no Deus.

⁴ Tudu kobon na incisidu; tudu monti, garandi ku pikininu, na justandadu; strada ku jingi na filantadu; kamiñu ku ka bali na niveladu.

⁵ Gloria di SIÑOR na bin manifesta; jinti di tudu mundu na ojal, pabia i SIÑOR ku fala asin ku si boka.”

⁶ Vos fala: “Grita!” Algin punta: “Ke ku N na grita?” “Tudu jinti i suma paja; tudu se bonitasku i suma floris di matu.

⁷ Paja ta seku, si floris ta konkoñi ora ku SIÑOR supra si folgu riba delis. Na bardadi, jinti i suma paja.

⁸ Paja ta seku, si floris ta konkoñi, ma palabra di no Deus ta manti pa sempri.”

⁹ Abo, kontadur di bon nobas pa Sion, subi na un monti altu. Abo, kontadur di bon nobas pa Jerusalen, yalsa bu vos ku forsa; yalsal, ka bu medi, bu fala prasas di Judá: “Ali bo Deus!”

¹⁰ Ali SIÑOR Deus na bin ku puder; si mon na domina; i na bin ku si premiu, ku pagamentu pruntu na si mon.

¹¹ I na toma konta di si karnelis suma bakiadur; i na lambu karnelsiñus, i leba elis na si mon; kilis ku na mamanta, i ta leba elis ku mansesa.

¹² Kin ku ciga di midi yagu di mar ku si mon, o kin ku ciga di midi seu ku palmu di si mon? Kin ku ciga di midi reia di con ku kaneka, o i pesa monti, garandi o pikininu, na balansu?

¹³ Kin ku ciga di gia Spiritu di SIÑOR, o kal konsijadur ku ciga di nsinal?

¹⁴ Kin ku SIÑOR ciga di pidi konsiju, pa dal ntindimentu, pa mostral kamiñu sertu, pa nsinal jiresa o pa fasil sibi kamiñu di kuñisimentu?

¹⁵ SIÑOR ta jubi nasons suma pingu di yagu na baldu, suma puera na balansu; i ta pesa jius suma mon di reia.

¹⁶ Nin tudu arvuris di Líbanu ka ciga leña pa fugu di altar, nin si limarias ka ciga pa ofertas kemadu.

¹⁷ Tudu nasons sedu suma nada si dianti; i ta jubi elis suma nada, suma kusa ku ka bali.

¹⁸ Nta kin ku bo na parsinti ku Deus? ke ku bo na komparal ku el?

¹⁹ Omi jitosu ta kumpu imaẑen; urivi ta kubril ku uru, i kumpu korentis di prata pa el.

²⁰ Un omi koitadi, ku ka pudi ranja un kusa karu suma kila, i ta kuji madera ku ka ta lestu di podri, i buska algin jiru pa labral imaẑen ku ta firma diritu, sin jingi-jingi.

²¹ Nta bo ka sibi? O bo ka obi? O bo ka kontadu e kusa disna di kumsada? Bo ka ntindi kuma ku mundu formadu?

²² Deus sta sintadu na tronu riba di globu di mundu, ku si moraduris ta parsi na si uju suma firmingas. El ku ta distindi seu suma kurtina; i ta disdobral suma tenda pa mora nel.

²³ Reis ku ŝefis di mundu, i ta bidanta elis suma nada.

²⁴ E sta suma planta ku kumsa sumiadu, ku si rais ka sta suguru na con. Deus ta supra riba delis; e ta seku; bentu ta buanta elis suma paja seku.

²⁵ Deus Santu punta: “Kin ku sta suma mi ku bo na parsintin ku el?”

²⁶ Bo yalsa uju pa riba, bo jubi kin ku kumpu ki kusas, ku ta tira ki manga di strela un son un son, i coma elis pa se nomis. Pabia di si garandi forsa ku puder, nin un son ka na falta.

²⁷ Jakó! Israel! Ke ku manda bu na papia asin, bu fala kuma bu kamiñu sta sukundidu di uju di SIÑOR, kuma bu Deus ka na mporta si bu ka na fasidu justisa?

²⁸ Bu ka sibi? Bu ka obi kuma ki Deus ku ka ten kumsada nin kabantada, ku sedu SIÑOR, kil ku kumpu tudu parti di mundu, i ka ta kansa, nin si forsa ka ta kaba? Ningin ka pudi sibi ke ki na pensa.

²⁹ I ta da forsa pa kil ku sta kansadu, i ta fortifika kil ku sta fraku.

³⁰ Jovens na kansa, e na pirdi forsa; rapasis nobu e na bin kai,

³¹ ma kilis ku na pera na SIÑOR e na arnoba se forsa. E na subi ku asas suma agia, e na kuri sin kansa, e na yanda sin pirdi forsa.