Isaias 39 - BIBLIA - traduson antigu in Krioulo

Rei di Babilonia manda ŝefis pa Jerusalen

¹ Na ki tempu, rei di Babilonia, Merodak-Baladan, fiju di Baladan, manda kartas ku pursenti pa Ezekias, pabia i obiba kuma kila sta duenti ma i staba ja minjor.

² Ezekias kontenti ku jinti ku mandadu, i mostra elis si armazen di rikesa — prata ku uru, kusas ku ta cera sabi ku minjor purfumus, si armazen di material di gera, ku tudu rikesas ki teneba. I ka sobra nada, nin na si kasa, nin na tudu si renu, ku Ezekias ka mostra elis.

³ Anunsiadur Isaias bai pa rei Ezekias, i puntal: “Nunde ku ki omis sai? Ke ke falau?” Ezekias ruspundil: “E bin pa mi di un tera lunju, ku sedu Babilonia.”

⁴ Isaias puntal: “Ke ke oja na bu kasa?” Ezekias ruspundil: “E oja tudu kusas ku N tene na ña kasa; nada ka sobra na ña armazens ku N ka mostra elis.”

⁵ Isaias fala Ezekias: “Obi palabra di SIÑOR ku ten tudu puder:

⁶ I na ciga dias ku tudu kusas ku bu tene na bu kasa, ku tudu ku bu papes rakada na armazen, te aos, e na lebadu pa Babilonia. SIÑOR fala kuma nada ka na fika.

⁷ Utru di bu fijus, ku abo propi bu na bin padi, e na lebadu pa sedu funsionarius na palasiu di rei di Babilonia.”

⁸ Ezekias fala Isaias: “E palabra di SIÑOR ku bu fala i bon.” I fala asin pabia i ntindi kuma, i na ten pas ku suguransa na tudu si tempu.