Isaias 38 - BIBLIA - traduson antigu in Krioulo

Ezekias duensi, i bin kuradu

¹ Na ki tempu Ezekias bin paña un duensa, kuas pa muri. Anunsiadur Isaias, fiju di Amoz, bai pa el, i falal: “SIÑOR fala pa bu ruma bu kasa, pabia bu ka na san; bu na muri.”

² Ezekias vira rostu pa paredi, i papia ku SIÑOR,

³ i fala: “O SIÑOR, lembra kuma ku N yanda diritu bu dianti ku korson limpu, N fasi kusas bon na bu uju.” Dipus i cora ciu.

⁴ SIÑOR bin papia ku Isaias, i falal

⁵ pa i bai fala Ezekias: “Asin ku SIÑOR, Deus di bu pape Davi, fala: N obi bu orason, N oja bu larmas. Ali N na buriu mas kinzi anu,

⁶ N na kaplintiu, abo ku e prasa, di mon di rei di Asiria; N na difindi e prasa.” (v 21) Isaias fala rei pa i fala jinti pa e kumpu pasta di figus, e kental, e pui na si caga; asin i ta san. (v 22) Ezekias puntal: “Kal ku na sedu sinal di kuma N na bin bai pa kasa di SIÑOR?”

⁷ Isaias falal: “Es i sinal ku SIÑOR na dau pa mostra kuma, si palabra ki fala, i na bin kumpril.

⁸ SIÑOR na pui sombra na orloju di sol di Akaz pa i riba tras des grau.” Asin sol, ku staba ja diantadu, i riba tras des grau.

⁹ Dipus di Ezekias, rei di Judá, bin san di ki duensa, i skirbi e palabras:

¹⁰ N fala: “Na anu mas minjor di ña vida N ten ku pasa na portas di mortu; N tiradu restu di ña anus di vida.”

¹¹ N fala: “N ka na oja mas SIÑOR na tera di jinti bibu. N ka na oja mas omi, nin N ka na sta ku moraduris de mundu.

¹² Tempu di ña vida i bai, i tiradu suma tenda di bakiadur ku dismancadu. I kortadu suma panu ku tiradu na makina di fisial Disna di parmaña te di noti i sta suma bu na kaba ku mi.

¹³ N sufri dur tok sol mansi; i sta suma lion na kebra tudu ña os; disna di parmaña te di noti i sta suma bu na kaba ku mi.

¹⁴ N fika N na cora suma jamba o andoriña; N na jimiba suma pumba. Ña ujus fika fraku manera ku N na jubi pa seu. O SIÑOR, N sta forontadu; sakuran!”

¹⁵ Ke ku N na fala? Suma ki falan, asin ki fasi. N na yanda ketu pa tudu ña anus pabia de kasabi ku N pasa.

¹⁶ SIÑOR, tudu e kusas tisi vida pa ña spiritu. Kuran, bu dan vida.

¹⁷ I pa N pudi ten pas ku N pasa na garandi kasabi. Abo, ku bu garandi amor, bu guardan pa ka N kai na koba di mortu, pabia bu bota tudu ña pekadus tras di bu kostas.

¹⁸ Algin ku nteradu ka pudi ngabau; kil ku muri ja ka pudi dau gloria; kilis ku na ria pa koba di mortus ka na pera bu bardadi.

¹⁹ Jinti bibu, i jinti bibu ku na bin ngabau, suma mi aos. Papes na konta fijus manera ku bu sedu bardadi.

²⁰ SIÑOR bin salban; e ku manda no na toka arpas, no na ngabal tudu dia di no vida na kasa di SIÑOR.