Isaias 34 - BIBLIA - traduson antigu in Krioulo

Deus na kastiga nasons

¹ Abos nasons, bo ciga pa obi; abos rasas, bo sukuta! Tera pa i obi, ku tudu ku sta nel, mundu ku tudu kil ku padidu nel.

² SIÑOR ten raiba kontra tudu nasons; si raiba forti sta riba di tudu se tropas. I na kaba ku elis tudu, i ntrega elis pa matansa.

³ Se mortus na botadu, e na fedi. Se sangi na lagua na montis.

⁴ Sol, lua ku strelas na disparsi; seu na roladu suma libru di rolu. Tudu strelas na kai suma ku fojas ta konkoñi di pe di uva, o suma figu ta konkoñi di si pe.

⁵ Ña spada bibi li na seu tok i cami; ali i na disi riba di Edon pa julga elis, ki pobu ku N na ntrega pa e kabadu ku el.

⁶ Spada di SIÑOR i kubridu di sangi ku gurdura — sangi di karnelsiñus ku kabras macu, gurdura di rins di karnel macu. SIÑOR tene sakrifisiu na Bozra, i tene garandi matansa na tera di Edon.

⁷ Omis forti ku jovens ku tropas mas di idadi e na kai juntu ku elis. Se tera na bibi sangi tok i farta; reia na fika gros di gurdura.

⁸ Kila na sedu dia di vingansa di SIÑOR, anu di difindi Sion, i geria pa el.

⁹ Rius di Edon na torna pretu suma alkatron; reia di si tera na bida nŝofri; si tera na sedu suma alkatron ku na yardi.

¹⁰ Fugu ka na paga nin di dia nin di noti; si fumu na subi pa sempri. Con na fika suma lala di un manjuandadi pa utru; nunka mas ningin ka na pasa la.

¹¹ Pilikanu ku kuruẑa na toma konta di tera, orisu ku korvu na mora la. Deus na midil i kunfundil; i na probal ku nivel, i kaba ku el.

¹² E na coma algin pa rena, ma i ka na ten; tudu se ŝefis na disparsi.

¹³ Spiñus ku utru fididas ku paja brabu na toma konta di se palasius ku kuartelis; i na sedu moradia pa kacur brabu ku avestruz.

¹⁴ Limarias brabu di matu na kontra ku lubus; kabra-matu na coma ŋutru. Kriaturas ku ta sai di noti na oja kau di dita, e diskansa la.

¹⁵ Kuruẑa na kumpu si niñu la, i bota si ovu, i kencil, i kria si pintons bas di sombra di si asas. Tambi falkon na junta la, kada un ku si kumpañer.

¹⁶ Bo buska na libru di SIÑOR, bo lei. Nin un de kriaturas ka na falta; nin un ka na fika sin si kumpañer, pabia i boka di SIÑOR ku fala asin; i si Spiritu ku na junta elis.

¹⁷ I el propi ku midi tera, i rapatil entri elis, kada kin ku si parti. I na pasa di pape pa fiju; e na tenel pa sempri.