Isaias 3 - BIBLIA - traduson antigu in Krioulo

Julgamentu di Judá ku Jerusalen

¹ SIÑOR, SIÑOR ku ten tudu puder, i na tira di Jerusalen ku Judá ki kusas ke ta nkuña nel, ku sedu tudu sustentu di pon ku tudu se yagu,

² omi forti ku omi di gera, juis ku anunsiadur, kil ku ta diviña ku omi garandi,

³ kapiton di sinkuenta ku omi rispitadu, konsijadur, kil ku ten jitu na tarbaju di artista, ku jambakus.

⁴ N na pui rapasis pa e sedu se ŝefis; mininus na guberna riba delis.

⁵ Kada kin na kalka si kumpañer; mininus na lanta kontra garandis; kilis ku ka sedu nada e na lanta kontra jinti di rispitu.

⁶ Algin na bai pa si ermon na kasa di se pape, i falal: “Abo bu tene ropa, bu ta sedu no ŝef, bu toma konta de foronta ku no sta nel.”

⁷ Na ki dia i na ruspundi ku vos altu, i fala: “Ami N ka sedu mediku. N ka tene nin kumida na kasa, ku fadi ropa. Ka bo pun pa N sedu ŝef di pobu.”

⁸ Jerusalen na balansa; Judá kai ja, pabia tudu ke na papia, ku kusas ke na fasi, sta kontra SIÑOR, pa disafia si parsensa gloriosu.

⁹ Se rostu ta mostra se kulpa; elis e ta peka dianti di jinti suma jinti di Sodoma ta pekaba; e ka ta sukundi. Ai delis! E ta fasi mal pa se kabesa.

¹⁰ Bo fala jinti justu kuma kusas na kuri elis diritu; e na kume frutu di ben ke fasi.

¹¹ Ai di omi mau! Kusas na kuril mal, pabia i na dadu pagamentu di kusas ki fasi ku si mon propi.

¹² Mininus na kalka ña pobu; minjeris ku na guberna. A, ña pobu! Kilis ku na giau e na nganau, e na disviantau di kamiñu ku bu dibi di sigi.

¹³ SIÑOR lanta pa pui si kasu, i firma pa julga nasons.

¹⁴ SIÑOR toma palabra kontra garandis ku ŝefis di si pobu, i fala elis: “Abos ku kume fruta di orta di uva. Kil ku furtadu di koitadi i sta na bo kasas.

¹⁵ Kal roson ku bo ten pa kastiga ña pobu, bo dana rostu di koitadis?” Asin ku SIÑOR, Deus ku ten tudu puder, punta.

Julgamentu di minjeris di Jerusalen

¹⁶ SIÑOR torna fala mas: “Minjeris di Sion i orgulyosu, e ta yanda ku garganti yalsadu; e ta atrai omis ku se uju, e ta yanda ku pasus kurtu. E ta faja se pe ku kaskavelu.

¹⁷ SIÑOR na pui mpincu na kabesa di minjeris di Sion, i na pui pa e pirdi tudu se kabelu.”

¹⁸ Na ki dia, SIÑOR na tira fajamentus di pe, kabesa, garganti,

¹⁹ oreja ku mon. I na tira se veus,

²⁰ ŝapeus, anel di pe ku se sintus, kaŝa di purfumu ku guardas,

²¹ anel pa dedu ku naris,

²² ropa di festa, panus di ronku, kapas, bolsas,

²³ spijus, ropa di liñu finu, lensus di kabesa ku veus kumpridu.

²⁴ Minjer ku ta cera di purfumu i na bin cera mal; kil ku ta pui sintu bonitu i na maradu ku korda; kil ku ta ronka ku moda di kabelu i na bida kareka; kil ku ta pui bistidu kumpridu i na bisti saku; kemadura na toma lugar di bonitasku.

²⁵ Omis di prasa na muri di spada; omis forti na kai na gera.

²⁶ Portons di prasa na jimi, e na cora; prasa na sedu suma minjer ku sinta na con, sin nada.