Isaias 23 - BIBLIA - traduson antigu in Krioulo

Anunsiu aserka di Tiru

¹ Es i rekadu di Deus aserka di Tiru. Barkus di Tarsis, bo pupa! Tiru danadu tok i ka tene kasa nin purtu pa barku yentra nel. Oca ku barkus na riba di Ŝipri, e obi nobas.

² Bo kala, abos ku mora lungu di mar, ku nogosiantis di Sidon fasi riku pabia di se bias di mar.

³ Miju di Sior bin na barku; kebur ku ta bin di con lungu di riu Nilu i tisi rikesa pa Tiru. I ta fasi nogos ku manga di nason.

⁴ O prasa di Sidon, kau forti di mar, ba ta burguñu, pabia mar fala: “N ka teneba dur di partu, nin N ka padi, ku fadi pa N kria rapas ku bajuda.”

⁵ Ora ku nobas di Tiru ciga na Ejitu, e na fika ku garandi kasabi.

⁶ Abos di jiu, bo pupa, bo kamba pa Tarsis.

⁷ Nta es i ki prasa antigu ku jinti ta jukutaba nel ku kontentamentu? I es ku ta mandaba si jinti lunju pa funda kolonias?

⁸ Kin ku ranja e planu kontra Tiru, ki prasa ku dadu koroa? Si nogosiantis sedu fijus di rei, jinti mas rispitadu na mundu.

⁹ SIÑOR ku ten tudu puder, el ku ranja e planu, pa kaba ku orgulyu di tudu bonitasku, pa baŝa kilis mas rispitadu na mundu.

¹⁰ Jinti di Tarsis, bo pega na labur, suma ke ta fasi lungu di Nilu, pabia bu ka tene ja purtu suguru.

¹¹ SIÑOR distindi si mon riba di mar, i turmenta renus. I da ordi kontra Fenísia pa kaba ku tudu si kaus forti.

¹² I fala: “O prasa di Sidon, ku sedu suma bajuda kalkadu, ku ka na jukuta mas ku kontentamentu, bu pudi lanta bu kamba pa Ŝipri, ma mesmu la bu ka na ten diskansu.”

¹³ Bo jubi e tera di Babilonia! I ka pobu di Asiria ma i jinti di Babilonia ku pui Tiru pa i sedu kau di limarias di lala. Tropas di Babilonia e lantanda toris di tajal, e bati si kuartelis, e disal danadu.

¹⁴ Abos mariñerus di Tarsis, bo cora, pabia bo kau forti i danadu.

¹⁵ Na ki tempu Tiru na diskisidu pa setenta anu, ku sedu anus di vida di un rei. Ora ku ki setenta anu kaba, Tiru na sedu suma minjer di mau vida ku kantiga kantadu pa el:

¹⁶ “Toma arpa, bu da volta na prasa, abo, minjer di mau vida ku diskisidu. Toka ben, bu kanta manga di kantiga, pa jinti pudi lembra di bo.”

¹⁷ Ora ku setenta anu kaba, SIÑOR na trata ku Tiru. I na riba pa tarbaju di mau vida ki ta fasiba. I na nogosia ku tudu renus di mundu.

¹⁸ Tudu diñeru ki na ngaña na nogos i na dedikadu pa SIÑOR. I ka na rakadadu o ficadu, ma si ngañu na sedu pa kilis ku ta sirbi dianti di SIÑOR, pa e pudi tene bastanti kumida ku ropa di bon koldadi.