Isaias 21 - BIBLIA - traduson antigu in Krioulo

Anunsiu kontra Babilonia

¹ Es i rekadu di Deus kontra lala lungu di mar. Suma urdumuñu ku bin di sul, i dana tudu, kastigu na bin di lala, di tera meduñu.

² N mostradu un vison duru. Falsiadur na falsia; danadur na yanda i na dana son pa bai. O Elan, bai bu ataka! O Media, taja prasa. N kaba ku tudu jimi di jinti ku Babilonia kastiga.

³ Ña kurpu na tursi ku dur. Dur toma konta di mi suma dur di minjer ku sta na partu. N foronta tok N ka pudi obi; N dismaja tok N ka pudi oja.

⁴ Ña sintidu ntrumpi; medu toma konta di mi. Fuska-fuska ku N dijaba i torna meduñu pa mi.

⁵ E pui mesa, e distindi tapetis, e na kume, e na bibi. Abos ŝefis, bo lanta, bo purpara tajaderas!

⁶ Asin ku SIÑOR falan: “Bai, bu pui sintinela; i ta kontau ke ki oja.

⁷ Ora ki oja tropas di kabalus, dus dus, ku utrus ku monta burus, utrus na kamelu, el i ta sukuta diritu, ku garandi atenson.”

⁸ Sintinela yalsa vos i fala: “Siñor, N sikidu li kada dia riba de tori di bisia; kada noti, tok sol mansi, N sta li, N na guarda.

⁹ Jubi, ala tropas di kabalus na bin, dus dus.” Utru algin ruspundi i fala: “Babilonia kai, i kai! Tudu imaẑens labradu di se deusis dita na con tudu kebrantadu.”

¹⁰ O ña pobu, bo masadu suma trigu na kau di masa! Kusa ku N obi di SIÑOR ku ten tudu puder, Deus di Israel, el ku N konta bos.

Anunsiu aserka di Dumá, ku sedu Edon

¹¹ Es i rekadu di Deus aserka di Edon. Jinti na coman di Seir, e puntan: “Guarda, kantu ora ku sobra e di noti? Kantu ora ku sobra pa sol mansi?”

¹² Guarda ruspundi i fala: “Parmaña na bin; di noti tambi na bin. Si bo misti punta, bo punta; bo bai, bo riba.”

Anunsiu aserka di Arabia

¹³ Es i rekadu di Deus aserka di Arabia. Abos, jinti di Dedanin ku sta na bias, bo na pasa noti na matu di Arabia.

¹⁴ Abos ku mora na tera di Tema, bo tisi yagu pa kilis ku tene sedi, bo tisi kumida pa kilis ku na kuri.

¹⁵ E na kuri pa kapli di spada ku tiradu na baiña, pa kapli di mansasa yarmadu, ku pirigu di gera.

¹⁶ SIÑOR papia e palabra ku mi, i falan: “Dentru di un anu (suma ku tarbajadur ta fasi konta di anu), tudu ronku di Kedar na disparsi.

¹⁷ Restu di kilis ku ta manda fleŝa, ku sedu tropas mas forti di fijus di Kedar, na sedu puku.” Asin ku SIÑOR, Deus di Israel, fala.