Isaias 20 - BIBLIA - traduson antigu in Krioulo

Utru anunsiu aserka di Ejitu ku Etiopia

¹ Sargon, rei di Asiria, manda Tartan; kila bai geria kontra prasa di Asdod, i tomal.

² Na ki mesmu anu, SIÑOR papia ku Isaias, fiju di Amoz, i falal: “Bai bu dispi ki saku ku bu tene na kurpu, bu tira sapatus na bu pe.” Asin ki fasi; i yanda dispidu ku pe na con.

³ SIÑOR fala: “Suma ku ña servu Isaias yanda tris anu dispidu ku pe na con, es i sinal di kusa ku na bin pa Ejitu ku Etiopia.

⁴ Rei di Asiria na leba katibus di Ejitu ku kilis ku tiradu na tera di Etiopia, rapasis ku bejus, dispidu, ku pe na con, sin nada na kurpu, ku sedu borgoña pa Ejitu.

⁵ Kilis ku puiba se speransa na Etiopia, ku ta njata pa Ejitu, e na panta, e fika ku borgoña.

⁶ Na ki dia, jinti ku mora lungu di mar na fala: ‘Jubi ke ku pasa ku ki jinti ku no na speraba nel, ku no kuri pa e sakuranu, e libranu di rei di Asiria! Kuma ku no na bin kapli?’ ”