Isaias 19 - BIBLIA - traduson antigu in Krioulo

Anunsiu aserka di Ejitu

¹ Es i rekadu di Deus aserka di Ejitu. Jubi, SIÑOR na bin dipresa, montadu riba di nuven; i na bin pa Ejitu. Idulus di Ejitu na tirmi si dianti; koraẑen di ejipsius na ribi dentru delis.

² “N na cuci ejipsius pa e lanta kontra ŋutru; kada un na geria kontra si ermon. Visiñu na lanta kontra visiñu, prasa kontra prasa, renu kontra renu.

³ Ejipsius na pirdi koraẑen; N na dana se planus. E na punta se idulus ku jambakusis, diviñaduris ku jinti ku ta konsulta difuntus.

⁴ N na ntrega ejipsius na mon di un siñor duru, un rei brabu ku na manda riba delis.” Asin ku SIÑOR, SIÑOR ku ten tudu puder, fala.

⁵ Yagu di riu Nilu na mingua tok i kaba seku tudu.

⁶ Baletas na cera mal; riusiñus di Ejitu na mingua, e kaba seku. Kanas ku paja ku nasi na riu na lati.

⁷ Tudu paja lungu di riu ku si riusiñus, ku tudu ku sumiadu lungu del, na seku, i na lebadu pa bentu tok i pirdi.

⁸ Piskaduris na jimi; tudu jinti ku ta bota ansol na riu na miskiña; kilis ku ta bota ridia na yagu na dismaja.

⁹ Kilis ku ta tarbaja ku liñu finu ku kilis ku ta tisi panu branku e na pirdi speransa.

¹⁰ Kilis ku ta kumpu fazenda na kebrantadu; kilis ku ta tarbaja pa ngaña fin di mis e na yanda tristi.

¹¹ Na bardadi ŝefis di Zoan tulu; konsijaduris jiru di Faraó ta da konsiju di tulesa. Kuma ku kualker delis pudi fala Faraó: “Ami i fiju di jinti jiru, fiju di reis di antigu”?

¹² Faraó, nunde bu jinti jiru? I bon pa e kontau, e tustumuñau ke ku SIÑOR ku ten tudu puder disidi kontra Ejitu.

¹³ Ŝefis di Zoan bida tulu; ŝefis di Memfis sta nganadu. Elis ku sedu pedra di kantu di se jorsons, e na fasi Ejitu yara.

¹⁴ SIÑOR darma na se metadi un spiritu di tontura. E pui jinti di Ejitu na kunfuson na tudu ke na fasi, suma algin ku cami ku na da volta na si ramasadura.

¹⁵ I ka ten nada ku algin pudi fasi na Ejitu ku pudi juda, nin si ki algin i kabesa o rabu, palmera o paja di riu.

¹⁶ Tempu na ciga ku ejipsius na sedu suma minjer; e na tirmi ku medu ora ke oja kuma SIÑOR ku ten tudu puder na lantanda mon kontra elis.

¹⁷ Pobu di Ejitu na sinti medu di Judá. Kil ku obi nomi di Judá comadu i ta inci medu, pabia di kusas ku SIÑOR ku ten tudu puder disidi kontra elis.

¹⁸ Na ki tempu jinti di sinku prasa na tera di Ejitu na papia lingua di Kanaan; e na fasi juramentu na nomi di SIÑOR ku ten tudu puder. Un delis na comadu Prasa di Sol.

¹⁹ Na ki tempu i na ten un altar di SIÑOR na metadi di tera di Ejitu. Un kuluna na lantandadu pa SIÑOR na si frontera.

²⁰ I na sirbi sinal ku tustumuñu na tera di Ejitu pa SIÑOR ku ten tudu puder. Ora ke coma SIÑOR pabia di se inimigus, i na manda elis un Salbadur ku na difindi elis, i libra elis.

²¹ SIÑOR na pui Ejitu pa i kunsil; ejipsius na rikuñisil na ki dia. Elis e na adoral ku sakrifisius ku ofertas di kumida; e na fasi purmesas pa SIÑOR ke na bin kumpri.

²² SIÑOR na kastiga ejipsius, i na kura elis. E na konverti pa SIÑOR; i na obi se orasons, i na kura elis.

²³ Ora ku tempu ciga, i na ten strada di Ejitu te na Asiria. Jinti di Asiria na bai pa Ejitu; ejipsius na bai pa Asiria. Jinti di Ejitu ku Asiria na adora SIÑOR juntu.

²⁴ Na ki dia i na ten tris nason, ku sedu Israel, Ejitu ku Asiria; e na sedu benson na mundu.

²⁵ SIÑOR ku ten tudu puder na bensua elis, i fala: “Ejitu, ña pobu, na sedu sortiadu, ku Asiria, tarbaju di ña mon, ku Israel ku sedu ña yardansa.”