Isaias 15 - BIBLIA - traduson antigu in Krioulo

Anunsiu kontra Moab

¹ Es i rekadu di Deus aserka di Moab. Na bardadi, na un noti, prasas di Ar ku Kir na tera di Moab e danadu, e kabadu ku el.

² Jinti di Dibon subi pa templu na kaus altu pa cora. Jinti di Moab na pupa pabia di Nebu ku Medeba. Tudu omis rapa kabesa ku barba.

³ Na ruas e bisti sakus; la riba di se kasas, tambi na kaus di nkontru na prasas, e na yanda e na pupa, e na cora ciu dimas.

⁴ Jinti di Esbon ku Elealé e na yanda e na grita; se vos na obidu te na Jaaz. Pabia di kila, tropas yarmadu di Moab e na grita, e na tirmi dentru delis.

⁵ N na cora na korson pabia di Moab; jinti ku kuri di la e bai pa Zoar, e ciga na Eglat-Selisia. E na cora na subida di Luit; na kamiñu di Oronain e na cora risu pabia di kastigu.

⁶ Yagu di Ninrin seku; paja seku, i muri; i ka ten paja verdi ku sobra.

⁷ Ki rikesa ke junta e guarda, e na lebal pa kamba riu di salgerus ku el.

⁸ Manera ke na cora, se vos na sua te na fronteras di Moab, i ciga na prasas di Eglain ku Beer-Elin.

⁹ Yagu di Dimon inci sangi, ma N na buri inda mas kastigu riba di Dimon. Lions na bai kontra kilis ku na kapli di Moab, ku kilis ku sobra na tera.