Isaias 12 - BIBLIA - traduson antigu in Krioulo

Kantiga di ngaba Deus

¹ Na ki dia bu na fala: “O SIÑOR, N falau obrigadu. Bu tenba raiba kontra mi, ma bu raiba fria, bu konsolan.

² Na bardadi, Deus i ña salbason; N na fiansa, N ka na medi, pabia SIÑOR Deus i ña forsa, el i ña kantiga, gosi i sedu ña salbason.”

³ Abos ku kontentamentu bo na tira yagu na fontis di salbason.

⁴ Na ki dia bo na fala: “Bo gardisi SIÑOR, bo coma si nomi; bo ta fasi nasons pa e sibi kusas ki fasi, bo konta kuma si nomi i garandi dimas.

⁵ Bo kanta pa SIÑOR pabia i fasi kusas garandi; es i dibi di sibidu na tudu mundu.

⁶ Abos ku mora na Sion, bo yalsa fála, bo kanta ku kontentamentu, pabia Deus Santu di Israel i garandi na bo metadi.”