Isaias 11 - BIBLIA - traduson antigu in Krioulo

Renu di pas

¹ Algin na padidu na jorson di Jesé suma ramu nobu ku sai na pe ku kortadu; na si rais i na sai nobu ramu ku na padi frutu.

² Spiritu di SIÑOR na sinta riba del, Spiritu di jiresa ku ntindimentu, Spiritu di konsiju ku puder, Spiritu di kuñisimentu ku rispitu pa SIÑOR.

³ I na sta kontenti na rispitu pa SIÑOR. I ka na julga konformi kil ki oja ku si uju, nin i ka na disidi konformi kil ki obi ku oreja,

⁴ ma i na julga koitadis ku justisa; i na difindi diritu di jinti mansu na tera. Konformi si ordi, jinti na kastigadu, omis mau na matadu.

⁵ I na guberna si pobu ku justisa ku bardadi.

⁶ Lubu na mora juntu ku fiju di karnel, leopardu na dita juntu ku kabritu, fijus di baka ku di lion e na yanda, e kume juntu; mininu pikininu na bakia elis.

⁷ Baka ku ursu na kume juntu; se fijus na dita juntu. Lion na kume paja suma baka.

⁸ Mininu ku na mama i na brinka riba di koba di kobra; kil ku tiradu ja na mama i na pui mon na koba di kobra tutu.

⁹ Na tudu Sion, ña monti sagradu, i ka na fasidu mal, nin danu ka na ojadu, pabia tera na inci kuñisimentu di SIÑOR suma ku yagu ta inci mar.

Jinti na riba di katiberasku

¹⁰ Dia na ciga ku rei ku na sai na jorson di Jesé na firma suma bandera pa nasons; e na kuri juntu pa el; lugar di si morada na sedu gloriosu.

¹¹ Na ki dia SIÑOR na torna distindi si mon pa liberta restu di si pobu, kilis ku sobra na Asiria, Ejitu, Patros, Etiopia, Elan, Babilonia, Amat, ku na jius ku teras lungu di mar.

¹² I na lantanda un bandera na metadi di nasons, i na junta jinti di Israel ku Judá ku pajigaduba fora di se tera, i na rukuji elis desdi kuatru kantu di mundu.

¹³ Nveẑa di Efrain na disparsi; inimisadi di Judá na kabadu ku el. Efrain ka na ten nveẑa di Judá; Judá ka na sedu inimigu di Efrain,

¹⁴ ma elis juntu e na ataka filisteus na kaida di sol suma falkon; e na ngaña, e na roba rikesa di jinti di saida di sol, ku sedu Edon ku Moab; fijus di Amon na fika bas delis.

¹⁵ SIÑOR na seka mon di mar di Ejitu; i na sana ku si mon riba di riu Eufrates pa tisi bentu kinti, i na rapatil na seti riusiñu ku kualker algin pudi kamba ku sapatu.

¹⁶ I na ten bon kamiñu pa si pobu ku sobra na Asiria, pa e pudi bin nel, suma ki tenba pa Israel oca ki sai di tera di Ejitu.