Gálatas 6 - BIBLIA - traduson antigu in Krioulo

Juda ŋutru ku kargu

¹ Ña ermons, si un algin ciga di kai di repenti na un kulpa, abos ku na yanda diritu ku Deus bo dibi di ndirital ku mansesa. Bo jubi pa bo kabesa, pa ka bo bin sedu tentadu tambi.

² Bo juda ŋutru ku kargu; asin bo ta fasi kil ku lei di Kristu fala.

³ Si algin kuda kuma el i algin, ma el i ka ningin, i na ngana si kabesa.

⁴ Kada kin dibi di jubi pa kil ki fasi; si i bon, i pudi kontenti ku si kabesa, sin i jubi pa kusa ku utru fasi,

⁵ pabia kada kin ten ku karga si propi kargu.

⁶ Si algin na nsinadu palabra di Deus, i dibi di rapati tudu kusa bon ki tene ku si pursor.

⁷ Ka bo ngana bo kabesa; ningin ka pudi fasi Deus diskarna. Kil ku omi sumia, i el ki na kebra tambi.

⁸ Kil ku sumia na si naturesa umanu i na bin kebra mortu la, ma kil ku sumia na Spiritu, i na kebra vida ku ka ta kaba ku Spiritu padi pa el.

⁹ Ka no kansa fasi ben. Ora ki ciga ora, no ta kebra si frutu, si no ka menusa forsa.

¹⁰ Asin, nkuantu no ten manera, no fasi ben pa tudu jinti, ma purmeru pa no familia na fe.

Avisu di kabantada ku manteña

¹¹ Bo jubi e letra garandi; gosi i ami ku na skirbi bos ku ña mon propi.

¹² Jinti ku misti forsija bos pa bo sirkunsidadu, elis ku misti ronka pa njata ku kusas di fora. E ta fasil son pa e pudi kapli pirsigison pabia di krus di Kristu.

¹³ Mesmu kilis ku ta sirkunsida jinti e ka ta obdisi tudu lei; e misti son pa bo sirkunsidadu pa e njata suma ku bo seta fasi ki sirmonia di kurpu.

¹⁴ Pa Deus lunjusin di njata na utru kusa ku ka sedu krus di no Siñor Jesus Kristu, kil ku, pabia del, mundu sta krusifikadu pa mi, ami pa mundu.

¹⁵ I ka ten nin importansia si algin sirkunsidadu o nau; ma ke ki importanti i pa sedu nobu algin.

¹⁶ Pa tudu kilis ku na yanda konformi e nsinamentu, pas ku miserikordia ta sta riba delis, tambi riba di tudu Israel di Deus.

¹⁷ Gosi pa dianti ka ningin dan mas kansera, pabia marka ku N tene na ña kurpu mostra kuma ami i katibu di Jesus.

¹⁸ Ermons, fabur di no Siñor Jesus Kristu ta sta ku bo spiritu. Amen.