Gálatas 5 - BIBLIA - traduson antigu in Krioulo

Guarda bo liberdadi

¹ Kristu libertanu pa no sedu libri. Bo fika firmi. Ka bo seta torna maradu mas na korenti di katiberasku.

² Bo sukuta ke ku N na fala. Ami Paulu, N na fala bos kuma, si bo seta sedu sirkunsidadu, Kristu ka ta ten nin balur pa bos.

³ Mas un bias N na avisa bos kuma, kualker omi ku seta pa i sirkunsidadu, i obrigadu guarda tambi tudu lei.

⁴ Abos tambi ku na sigi lei pa pudi ojadu justu, bo ligason ku Kristu sta kortadu; bo kai di fabur di Deus.

⁵ Suma nos, no speransa ku no na pera i pa no ojadu justu pa tarbaju di Spiritu di Deus pabia di no fe.

⁶ Si no sta unidu ku Kristu Jesus, nin sirkunsison nin falta del ka ta fasi diferensa. Kusa mas importanti i fe ku ta tarbaja ku amor.

⁷ Bo na kuriba diritu. Kin ku bin tuji bos sigi bardadi?

⁸ E ngodu i ka bin di Deus ku coma bos.

⁹ Un bokadu di fermentu i ta orfa tudu masa.

¹⁰ No unidadi na Siñor i dan fiansa kuma bo ka na kuda di utru manera, ma ki algin ku na disinketa bos, kualker algin ki sedu, Deus na kastigal.

¹¹ Ami, ermons, si inda N na fala pa jinti sedu sirkunsidadu, pa ke ku N pirsigidu? Ne manera N ka na fala di krus pa ka N ofindi ningin.

¹² Ma ki disinketaduris, i mas minjor e bai kabanta kapa se kurpu!

¹³ Abos, ermons, bo comadu pa liberdadi; ma ka bo usa liberdadi suma diskulpa pa disa vontadi di bo kurpu manda na bos, ma bo sirbi ŋutru ku amor.

¹⁴ Tudu lei sta juntu ne un palabra: “Ama bu kumpañer suma bo propi.”

¹⁵ Ma si bo na murdi, bo molosta ŋutru, bo toma sintidu pa ka bo kaba ku ŋutru.

Frutu di Spiritu di Deus ku naturesa di omi

¹⁶ N misti fala bos pa bo yanda konformi Spiritu di Deus na gia bos. Asin bo ka na sigi diseẑu mau di bo naturesa.

¹⁷ Kil ku no naturesa umanu misti i kontra kil ku Spiritu misti. Kil ku Spiritu tambi misti i kontra no naturesa. E dus e ta geria kontra ŋutru; asin bo ka ta pudi fasi kil ku bo misti,

¹⁸ ma si Spiritu gia bos, bo ka sta bas di lei.

¹⁹ I klaru kuma ku naturesa di omi ta fasi; i ta mostradu na pekadu seksual, vida susu, puku borgoña,

²⁰ adora idulus, futis, inimisadi, jus, kumbosadia, raiba, geras, junda-junda, rapatimentu di partidus,

²¹ nveẑa, bibidera, wukesa, ku utru kusas ku parsi suma es. N na avisa bos, suma ku N tarda avisaba ja, kuma kilis ku ta fasi asin ka na ten parti na renu di Deus.

²² Spiritu di Deus ta padi frutu di amor, alegria, pas, pasensa, pruntidon pa juda, bondadi, sedu algin di fiansa, mansesa ku puder pa guberna kurpu.

²³ I ka ten lei kontra e kusas.

²⁴ Kilis ku sedu di Kristu Jesus e krusifika se naturesa umanu, ku tudu diseẑu mau ku na yardi dentru di ki naturesa.

²⁵ Si i Spiritu ku danu vida, no disal tambi pa i gianu na no kamiñu.

²⁶ Ka no sedu garandiosu, pa ba ta provoka ŋutru, pa nveẑa ŋutru.