Gálatas 4 - BIBLIA - traduson antigu in Krioulo

No ka sedu mas katibus, ma fijus

¹ Pa no kontinua, fiju ku na risibi yardansa di si pape, nkuantu i nobu i ta tratadu suma katibu, nin ku tudu i di sil.

² I ta sta bas di mestres ku prokuraduris te tempu ku si pape markaba.

³ Asin tambi anos, antis di no maduru, no seduba katibu di manga di lei di mundu.

⁴ Oca tempu propi ciga, Deus manda si Fiju, ku padidu di minjer, i kria bas di lei,

⁵ pa i pudi liberta kilis ku staba bas di lei, pa no pudi bin sedu fijus di Deus.

⁶ Suma ku bo sedu si fijus, Deus manda Spiritu di si Fiju dentru di no korson, ku ta coma: “Deus no Pape.”

⁷ Asin bu ka sedu mas katibu, ma bu sedu fiju. Si abo i fiju, Deus na dau tudu ki tene pa si fijus.

Kudadi di Paulu pa jinti di Galásia

⁸ Purmeru, oca bo ka kunsiba Deus, bo seduba katibu di spiritus ku ka sedu deusis.

⁹ Gosi ku bo kunsi Deus, o N dibi di fala, ku Deus kunsi bos, kuma ku bo pudi riba mas pa ki leis fraku i pobri? Pabia di ke ku bo misti sedu se katibu utru bias?

¹⁰ Bo ta guarda dias, misis, tempus ku anus.

¹¹ N medi pa bos, pa ña tarbaju pa bos ka bin sedu suma mon di sal na yagu.

¹² Ermons, N na pidi bos pa bo sedu suma mi, pabia ami N sedu suma bos. Nin un mal bo ka fasin.

¹³ Bo sibi kuma i duensa na ña kurpu ku pun pa N bai konta bos Bon Noba purmeru bias,

¹⁴ ma mesmu ku stadu di ña kurpu seduba un proba pa bos, bo ka njutin, nin bo ka negan, ma bo risibin suma anju di Deus, o suma Kristu Jesus propi.

¹⁵ Kontentamentu ku bo tenba, nunde ki bai? N pudi da tustumuñu kuma, si bo pudiba, bo ta rinka bo ujus, bo danba.

¹⁶ Nta gosi N sedu bo inimigu suma ku N konta bos bardadi?

¹⁷ Ki utru jinti e ten garandi interes na bos, ma se sintidu i ka bon. E misti separa bos di utru jinti, pa bo pudi ten interes nelis.

¹⁸ I bon pa ten interes, si i pa bon sintidu. I bon sempri; i ka pa son ora ku N sta ku bos.

¹⁹ Ña fijus ku N ama, kilis ku N torna na sinti dur di partu pa el, tok Kristu sedu formadu na bos,

²⁰ N misti sta juntu ku bos gosi pa N rabida ña fála, pabia N sta fadigadu pabia di bos.

Sara ku Agar

²¹ Pera N punta bos utrus ku misti sta bas di lei: Bo ka obi ke ku lei fala?

²² I sta skritu kuma Abraon teneba dus fiju, un di katibu, utru di si minjer libri.

²³ Fiju di katibu i padidu suma tudu mininu, ma kil ki di libri i padidu suma ku Deus falaba.

²⁴ E kusa i pudi ntindidu suma figura. E dus minjer i dus kontratu. Kil ku padi fiju pa katiberasku i kontratu ku bin di Monti Sinai. Es i parsi Agar.

²⁵ Sinai i un monti na Arabia ku parsintidu ku Jerusalen di gosi, pabia el ku si jinti e sta na katiberasku,

²⁶ ma Jerusalen di seu i libri; el ki no mame.

²⁷ I sta skritu: “Abo, minjer sebadu, ku nunka ka padi, fika kontenti! Abo ku nunka ka sinti dur di partu, grita ku forsa, ku alegria! Pabia minjer ku bandonadu i na tene mas fijus di ki kil ku tene maridu.”

²⁸ Anos, ermons, no sedu fijus suma Isak, konformi Deus falaba.

²⁹ Suma na ki tempu kil ku padidu suma tudu mininu i pirsigi kil ku padidu pabia di Spiritu di Deus, asin tambi gosi i ta kontisi.

³⁰ Ma ke ku Skritura fala? I fala kuma, pa serka katibu ku si fiju, pabia fiju di katibu ka na ten parti na yardansa juntu ku fiju di libri.

³¹ Asin, ña ermons, no ka sedu fijus di katibu, ma di minjer libri.