Gálatas 3 - BIBLIA - traduson antigu in Krioulo

Lei o fe?

¹ Abos tulus di Galásia! Kin ku mbarianta bos? Mortu di Jesus Kristu na krus staba klaru na bo uju.

² Son es ku N misti sibi di bos: Bo risibi Spiritu di Deus pabia di fasi kil ku lei fala, o pabia bo fia na Bon Noba ku bo obi?

³ Kuma ku bo sedu tulu asin? Bo kumsa na Spiritu di Deus, bo misti kabanta na bo forsa!

⁴ Nta tudu ku bo pasa i ka sedu nada? Sertamenti i sedu un kusa.

⁵ Deus ta da bos Spiritu, i ta fasi milagris na bo metadi. I ta fasil pabia bo fasi kil ku lei fala, o pabia bo fia na Bon Noba ku bo obi?

⁶ Bo jubi pa Abraon. El i fia na Deus; si fiansa pui Deus ojal justu.

⁷ Bo dibi di ntindi kuma, jinti ku ten fe, elis ku sedu fijus di Abraon.

⁸ Skritura jumna mostra kuma, Deus ta fasi jintius justu si dianti pabia di se fe, suma ku Deus konta Abraon Bon Noba kuma, tudu nasons ten ku sedu bensuadu pabia del.

⁹ Abraon fia; Deus bensual. Tudu kil ku fia tambi, Deus ta bensual juntu ku Abraon.

¹⁰ Kilis ku pui se fiansa na obdisi lei e sta bas di maldison, pabia Skritura fala kuma: “Tudu kil ku ka ta kontinua fasi tudu kusa ku sta skritu na libru di lei i maldisuadu.”

¹¹ I klaru kuma ningin ka na ojadu justu dianti di Deus pabia i kumpri lei, ma i sta skritu kuma, kil ku sedu justu, i na vivi pabia di si fe.

¹² Lei ka ten nada ku fe, ma i sta skritu kuma, kil ku ta fasi kusas ku lei fala, el i na yangasa vida.

¹³ Suma ku Kristu bida maldison pa nos, i kaplintinu di maldison ku lei tisi, pabia i sta skritu kuma, tudu kil ku pindradu na krus di madera i maldisuadu.

¹⁴ Kristu fasi asin pa benson ku Deus fala i na da Abraon pudi dadu pa jintius pabia di Jesus Kristu, pa anos, suma no fia, no pudi risibi Spiritu ku Deus fala i na da.

Lei ku purmesa

¹⁵ Ermons, N misti da bos un isemplu di kusa ku bo na ntindi. Si un omi fasi testamentu, i sina si nomi nel, ningin ka pudi pajigal nin buri utru kusa la.

¹⁶ Agora, Deus da si purmesa pa Abraon ku si fiju. Skritura ka fala “fijus” ku sedu manga delis, ma i fala “pa bu fiju” ku sedu un son, ki Kristu.

¹⁷ Ke ku N misti fala, kuma Deus fasi kontratu ku Abraon, i da sertesa na si palabra kuma i na fasil. Lei, ku bin bin kuatrusentus i trinta anu dipus, i ka pudi dana ki kontratu, nin pa mainanta purmesa.

¹⁸ Si kil ku Deus na da i sedu pabia di lei, nta i ka pabia di purmesa, ma na bardadi Deus pati Abraon ki kusa pabia i purmiti.

¹⁹ Nta lei i pa ke? I buridu pa mostra ke ki mau. I sedu pa te ora ku ki fiju bin, ku purmesa dadu pa el. Anjus ntrega lei na mon di un midianeru, ku sedu un omi ku staba na metadi di Deus ku pobu.

²⁰ Midianeru i ka pirsis si i ten un algin son, ma Deus i un son.

²¹ Nta lei na fala kontra purmesas di Deus? Nau. Si i daduba un lei ku pudiba da vida, nta algin pudi ojaduba justu pabia di ki lei,

²² ma Skritura fala kuma, tudu jinti sta bas di puder di pekadu, pa Deus pudi da krentis ki kusa ki fala i na da kilis ku fia na Jesus Kristu.

²³ Antis di fe ciga, lei guardanu tudu ficadu bas del, nkuantu no na peraba fe pa i bin.

²⁴ Asin lei seduba mestre ku ten konta di nos tok Kristu bin, pa dipus ki bin, Deus pudi ojanu justu pabia di fe nel.

²⁵ Suma ku fe bin ja, no ka sta mas bas di mestre.

²⁶ Pabia di fe na Kristu Jesus, abos tudu bo sedu fijus di Deus.

²⁷ Bo batisadu tudu na unidadi ku Kristu; bo bisti si vida suma ropa.

²⁸ Asin i ka ten judeu ku gregu, i ka ten katibu ku libri, i ka ten macu ku femia, pabia abos tudu bo sedu un son na Kristu Jesus.

²⁹ Si bo pertensi Kristu, bo sedu jorson di Abraon, bo na risibi kil ku Deus fala i na da.