Gálatas 2 - BIBLIA - traduson antigu in Krioulo

Paulu ku utru apostolus

¹ Oca ki pasa katorzi anu, N bai utru bias pa Jerusalen, ku Barnabé. N leba tambi Titu ku mi.

² N bai, pabia Deus mostran kuma N dibi di bai. Na un runion aparti ku garandis di igreẑa, N konta se dianti Bon Noba ku N ta konta pa kilis ku ka sedu judeus. N ka mistiba pa tarbaju ku N fasi, ku N na fasiba inda, sedu na nada.

³ Nin Titu, ña kumpañer, ku sedu gregu, i ka obrigadu pa i sirkunsidadu,

⁴ kontudu utrus mistiba pa i sedu. E finji sedu ermons, e yentra sukundidu suma spion pa pudi jubi liberdadi ku no ten na no ligason ku Kristu Jesus. E misti mitinuba na kansera di lei,

⁵ ma no ka seta se ordi nin pa un ora, pa bardadi di Bon Noba pudi fika firmi na bo metadi.

⁶ Kilis ku parsiba kuma e sedu garandis di igreẑa (ma se garandesa i ka nada pa mi; Deus ka ta jubi parsensa di jinti); N fala: esis ku parsiba sedu garandis, e ka dan nobu ideia,

⁷ ma e oja kuma Deus dan tarbaju di konta Bon Noba pa kilis ku ka sedu judeus, suma ki da Pedru pa judeus.

⁸ Deus ku tarbaja ku puder dentru di Pedru pa fasil apostolu pa judeus, el tambi ku tarbaja ku puder na mi pa fasin apostolu di kilis ki ka judeus.

⁹ Oca ku Pedru, Tiagu ku Jon, ku parsiba sedu firkijas, e rapara kuma i Deus ku danba e tarbaju, e danu mon, ami ku Barnabé, suma se kumpañeris di tarbaju. No konkorda kuma anos no ta bai pa kilis ki ka judeus; elis e ta bai pa judeus.

¹⁰ E rekumendanu son pa no ba ta lembra di koitadis di igreẑa di judeus. I un kusa ku N buska fasi ku mpeñu.

Paulu raprindi Pedru na Antiokia

¹¹ Oca ku Pedru ciga na Antiokia, N papia kontra el si dianti, pabia i tenba kulpa.

¹² Antis di ciga kilis ku Tiagu manda, i ta kumeba ku kilis ki ka judeus, ma oca ke ciga, i fika i na kuri, i ka kume mas ku elis, pabia i medi kilis ku na nsina kuma tudu krenti dibi di sirkunsidadu.

¹³ Ki utru krentis judeu tambi finji suma Pedru, na manera ku te Barnabé lebadu na ki finjimentu.

¹⁴ Oca ku N oja kuma e ka na yanda diritu suma bardadi di Bon Noba, N fala Pedru dianti delis tudu: “Si abo ku sedu judeu bu ka na yanda suma judeu, ma bu na yanda suma jintiu, kuma ku bu pudi obriga jintius pa e vivi suma judeus?”

Salbason di judeu ku jintiu i son pa fe

¹⁵ Anos i judeu di nasimentu; no ka sedu jinti di utru rasa ku fasi pekadu,

¹⁶ ma suma no sibi kuma omi i ka fasidu justu pabia i fasi kil ku lei fala, ma pa fe na Jesus Kristu, anos tambi no seta Jesus Kristu pa no pudi fasidu justu pa fe nel; i ka pabia no fasi kil ku lei fala. Ningin ka pudi fasidu justu pabia i fasi kil ku lei fala.

¹⁷ Si anos, ku na buska fasidu justu na no ligason ku Kristu, no na ojadu ku pekadu suma kilis ki ka judeus, N punta: I pabia Kristu na sirbi pekadu? Di nin un manera!

¹⁸ Si N torna kumpu kualker kusa di lei ku N danaba ja, N ta ojadu, ami propi, suma kil ku ta kebra lei.

¹⁹ Na ladu di lei N sta mortu; i lei propi ku matan, pa N pudi vivi pa Deus.

²⁰ N sta ja krusifikadu ku Kristu. N na vivi; i ka ami ku na vivi, ma Kristu na vivi na mi. Vida ku gosi N na vivi na kurpu, N na vivil na fe ku N ten na Fiju di Deus, kil ku aman, i ntrega si vida pa mi.

²¹ N ka na nega fabur di Deus. Si algin ta fasidu justu pabia di sigi lei, nta mortu di Kristu ka sedu nada.