Gálatas 1 - BIBLIA - traduson antigu in Krioulo

Kumsada ku manteña

¹ E karta i di mi, Paulu, apostolu. I ka omi ku coman pa N sedu apostolu, nin e comada ka bin pabia di omi, ma i Jesus Kristu ku coman, ku Deus Pape ku lantandal di mortu.

² Ami ku tudu ermons ku sta ku mi no na skirbi pa igreẑas di Galásia.

³ N misti pa Deus no Pape ku no Siñor Jesus Kristu da bos fabur ku pas.

⁴ Pa libertanu de tempu mau ku no sta nel, Kristu da si vida pa no pekadu, suma ku Deus no Pape mistiba,

⁵ kil ku dibi di dadu gloria pa sempri. Amen.

Bon Noba i un son

⁶ N fika dimiradu suma ku bo lestu di da kosta pa kil ku coma bos na fabur di Kristu, pa bo bai pa utru bon noba.

⁷ Na bardadi i ka ten utru bon noba, ma i ten jinti ku na kunfundi bos; e misti tursi Bon Noba di Kristu,

⁸ ma nin ki anos propi, o anju di seu, ku torna konta bos bon noba ku ka juntu ku kil ku no kontaba ja bos, i ta sedu maldisuadu.

⁹ Suma ku no fala ja, N na torna ripitil: Si algin konta utru bon noba ku ka juntu ku kil ku bo seta ja, i ta sedu maldisuadu.

¹⁰ N na papia pa ngaña fabur di omi o di Deus? O N na buska pui omi kontenti? Si N na buskaba inda pui omi kontenti, N ka ta sedu servu di Kristu.

Manera ku Paulu bin sedu apostolu

¹¹ Pera N konta bos un kusa, ermons. Bon Noba ku N na konta i ka di omi,

¹² pabia N ka risibil di nin un omi, nin i ka omi ku nsinan el. I Jesus Kristu propi ku mostran el.

¹³ Bo obi ja kuma ku ña vida seduba oca N staba na riliẑion di judeu, manera ku N ta pirsigiba ku forsa igreẑa di Deus, N buska kaba ku el.

¹⁴ Na ña rasa N mas ba manga di ña manjuas na sigi riliẑion di judeu. N forti ba dimas na fasi usu di ña papes antigu.

¹⁵ Deus kujin antis di N padidu, i coman pa si fabur.

¹⁶ Oca ku Deus mostran si Fiju, konformi si vontadi, pa N pudi konta aserka del na metadi di kilis ki ka judeus, N ka pidi konsiju na nin un algin,

¹⁷ nin N ka bai Jerusalen pa oja ku ki utrus ku seduba ja apostolus antis di mi, ma N bai Arabia; dipus N riba utru bias pa Damasku.

¹⁸ Tris anu pasa; N bin bai pa Jerusalen pa bai visita Pedru, N tarda la kinzi dia ku el,

¹⁹ ma N ka oja nin utru apostolu, fora di Tiagu, ermon di Siñor.

²⁰ Ke ku N skirbi i bardadi. Dianti di Deus N ka na konta mintida.

²¹ Dipus N bai pa parti di Siria ku Silísia.

²² Krentis di igreẑas di Kristu na Judeia e ka kunsiba ña rostu.

²³ E obi son ña noba, kuma kil ku ta pirsigi elis, gosi i na konta aserka di ki fe ki mistiba kaba ku el.

²⁴ Asin e na da Deus gloria pabia di mi.