Filipensis 4 - BIBLIA - traduson antigu in Krioulo

Konsiju

¹ Asin, ña ermons ku N ama ciu, ku N ten saudadi del, ña alegria ku ña koroa, bo fika firmi na Siñor ne manera, ña kiridus.

² Evódia ku Síntiki, N roga bos pa bo buska fila ku ŋutru suma irmas na Siñor.

³ Abo tambi, ña kumpañer fiel, N pidiu pa bu juda ki minjeris, pabia e tarbaja ciu ku mi pa konta Bon Noba, ku Klementi, ku utrus ku no tarbaja juntu ku elis, ku se nomi sta skritu na libru ku tene nomi di bibus.

⁴ N pidi bos, bo kontenti sempri na Siñor. Utru bias N na ripiti: Bo kontenti.

⁵ Bo mansesa pa i kunsidu pa tudu jinti. Siñor sta pertu.

⁶ Ka bo fadiga ku nada, ma na tudu bo orason bo pidi Deus pa kil ku bo pirsisa del; bo pidil ku korson di gardisimentu.

⁷ Asin, pas di Deus ku pasa tudu ntindimentu i ta guarda bo korson ku bo pensamentu na unidadi ku Kristu Jesus.

⁸ Pa kabanta, ña ermons, bo inci bo kabesa ku tudu kusa ki di bardadi, retu, justu, puru, bon, tudu ku pudi amadu, tudu ki di bon fama, tudu ku mersi ngaba; bo pensa ne kusas.

⁹ Tambi bo fasi kil ku N nsina bos, kil ku bo risibi, ku bo obi na ña boka, ku bo oja na mi. Deus ku ta da pas ta sta ku bos.

Gardisimentu pa oferta

¹⁰ N sta kontenti dimas na Siñor suma ku, dipus di manga di tempu, bo torna mostra bo manera di kuida di mi. I ka kuma bo diskisi di mi, ma i manera di manda ku ka tenba.

¹¹ N ka na fala asin suma N ten falta, pabia N nsina sta kontenti ku kil ku N tene.

¹² N sibi pasa falta; N sibi tambi tene ciu. N nsina manera di pasa na tudu kusa ku sedu na ña vida. N sibi pasa fomi ku fartura; N sibi tene ciu o puku.

¹³ N ten forsa pa tudu kusa pabia di Kristu ku ta dan puder.

¹⁴ Ma i bon dimas manera ku bo judan na ña kansera.

¹⁵ Abos di Fílipus, bo sibi diritu, na kumsada di tarbaju di konta Bon Noba, oca ku N sai di Masedonia, kuma nin un igreẑa ka lembra di manda patin kualker sustentu, son abos.

¹⁶ Oca ku N staba na Tesalónika, i ka un bias ma dus ku bo mandan ki ajuda ku N pirsisaba.

¹⁷ I ka kuma N misti son oferta, ma N misti pa Deus buri bos ngañu pa kil ku bo fasi.

¹⁸ N risibi ciu; kil ku bo mandan i ciu dimas. N tene tudu ku N pirsisa del, suma ku Epafroditu dan kil ku bo mandan. I suma oferta ku ta cera sabi pa Deus, ki ta kontenti pa risibi.

¹⁹ Pabia di Kristu Jesus, ña Deus i ta da bos tudu ku bo pirsisa, konformi si rikesa gloriosu.

²⁰ Gloria pa Deus no Pape pa sempri. Amen.

Manteña di kabantada

²¹ N na manda manteña pa tudu pobu di Deus ku sta ligadu ku Kristu Jesus. Ermons ku sta ku mi e manda bos manteña.

²² Tudu pobu di Deus li e manda bos manteña, purmeru kilis di kasa di rei garandi.

²³ Fabur di Siñor Jesus Kristu ta sta ku bos tudu. Amen.