Filipensis 2 - BIBLIA - traduson antigu in Krioulo

Umildadi di Kristu ku si garandesa

¹ Bo vida na Kristu ta fasi bos forti, si amor ta konsola bos, Spiritu ta da bos kumuñon, bo ta sinti garandi amor pa ŋutru, bo ta sinti pena di ŋutru.

² Suma ki sedu asin, bo ta kompleta ña kontentamentu; bo ten un mesmu manera di pensa, mesmu amor, mesmu sintidu ku mesmu ideia.

³ Ka bo fasi nada ku spiritu di kumbosadia o di garandesa, ma ku umildadi kada kin dibi di oja si kumpañer mas di ki el.

⁴ I ka dibi di jubi son pa si interes, ma pa di utru tambi.

⁵ Sentimentu ku bo dibi di ten i kil ku Kristu Jesus tenba, suma ku no ta kanta:

⁶ “Sempri i teneba naturesa di Deus, ma i ka kuda kuma i dibi di buska sedu igual ku Deus a forsa.

⁷ I pui si kabesa suma nada; i toma naturesa di servu, i bida suma omi.

⁸ Oca i staba na forma di omi, i baŝa si kabesa; i yanda sempri na obdiensia te mortu, ki mortu di krus.

⁹ Pa e roson Deus yalsal te lugar mas altu, i dal un nomi riba di tudu utru nomi,

¹⁰ pa tudu jinti na seu, ku tera, ku bas di tera, ten ku finka juju pa da Nomi di Jesus rispitu.

¹¹ Kada boka ten ku konta klaru kuma Jesus Kristu i Siñor pa gloria di Deus no Pape.”

Lampra suma lus na mundu

¹² Asin, ña amigus ku N ama, suma ku bo obdisin sempri ocan ku bos, gosi ku N ka sta la i mas importanti inda pa bo obdisi. Na rispitu ku medu bo pui bo salbason pa i tarbaja,

¹³ pabia i Deus ku ta tarbaja na bos pa da bos diseẑu ku puder pa kumpri si bon vontadi.

¹⁴ Bo fasi tudu kusa sin keŝa o diskuti,

¹⁵ pa bo pudi sedu puru, inosenti, fijus di Deus sin kulpa, ku na vivi na mundu di jinti mau i tortu. Bo ten ku lampra na se metadi suma strelas ku na numia mundu,

¹⁶ kontra bo na da elis palabra di vida. Si bo fasi asin, N ta ten ku njata na bos na Dia di Kristu, pabia i ta mostra kuma tudu ña kurida ku ña tarbaju i ka sedu amonton.

¹⁷ Si kontra ña sangi ten ku darmadu suma oferta riba di bo fe ku sedu suma sakrifisiu pa Deus, N ta kontenti; N ta rapati ña alegria ku bos tudu.

¹⁸ Di mesmu manera, bo kontenti tambi; bo rapati bo alegria ku mi.

Timótiu ku Epafroditu

¹⁹ Si i vontadi di Siñor Jesus, N spera kuma N ka na tarda pa manda bos Timótiu, pa N pudi fika animadu pa obi bo noba.

²⁰ El i uniku ku ten sintidu suma mi, ku ta ten interes di bardadi pa bos.

²¹ Tudu jinti ta kuda son di se kabesa; e ka ta mporta ku kil ki di Kristu Jesus.

²² Abos propi bo sibi kuma ki da proba di si balur, manera ki tarbaja ku mi na sirvis di Bon Noba suma fiju ku si pape.

²³ Asin N na pera manda bos el, ora ku N sibi kuma ku ña kasu na bai.

²⁴ N fia na Siñor kuma ami propi N ka na tarda, N na bai nunde bos.

²⁵ N oja kuma i bon pa N manda bos no ermon Epafroditu, ña kumpañer di tarbaju ku di luta, kil ku bo mandanba pa i judan na ña nesesidadi.

²⁶ I sinti saudadi di bos tudu; i fika ku kasabi suma ku bo obi kuma i staba duenti.

²⁷ Na bardadi i staba duenti, kuas pa muri, ma Deus ten pena del; i ka son del, ma tambi di mi, pa ka N ten tristesa riba di tristesa.

²⁸ E ku manda N na manda bos el mas dipresa, pa bo pudi ojal utru bias, bo fika kontenti; ami N ta ten menus tristesa.

²⁹ Asin bo risibil ku garandi kontentamentu, suma un ermon na Siñor. Bo rispita jinti suma el,

³⁰ pabia i riska si vida, kuas pa muri, pabia di tarbaju di Kristu, pa dan ajuda ku abos bo ka pudi danba.