Filipensis 1 - BIBLIA - traduson antigu in Krioulo

Kumsada ku manteña

¹ Anos, Paulu ku Timótiu, servus di Kristu Jesus, no na skirbi pa tudu pobu di Deus na Fílipus ku sta ligadu ku Kristu Jesus, tudu ku se garandis ku diákunus.

² N misti pa Deus no Pape ku Siñor Jesus Kristu da bos fabur ku pas.

Orason pa jinti di Fílipus

³ N ta fala Deus obrigadu tudu bias ku N lembra di bos.

⁴ Kada bias ku N na ora pa bos tudu, N ta ora ku alegria,

⁵ pabia di manera ku bo judan na tarbaju di Bon Noba disna di purmeru dia te gosi.

⁶ N sta sertu di un kusa, kuma, kil ku kumsa e bon tarbaju na bos i na bai dianti ku el, tok i kompletal na Dia di Kristu Jesus.

⁷ N tene bos sempri na ña korson. E ku manda N oja kuma i justu pa N sinti asin pa bos, pabia abos tudu bo ta toma parti na mison ku Deus dan, tantu na kalabus suma ora ku N na difindi pa firmanta bardadi di Bon Noba.

⁸ Deus i ña tustumuña kuma ku N ten garandi diseẑu di bos tudu, ku saudadi fundu ku bin propi di korson di Kristu Jesus.

⁹ Es i ña orason, pa bo amor buri kada bias mas, na kuñisimentu, tambi ku tudu ntindimentu,

¹⁰ pa bo pudi sibi kuji kusa mas bon, pa na Dia di Kristu bo ta sta limpu, sin kulpa.

¹¹ Ku puder ku Jesus Kristu ta pui dentru di bos, bo ta mostra ki bon manera di sedu ku ta pui jinti glorifika Deus, pa e ngabal.

Kalabus di Paulu i pa purbitu di Bon Noba

¹² Ermons, N misti pa bo sibi kuma kusas ku kontisi ku mi i juda pa mas avansu di Bon Noba,

¹³ di manera ku tudu guarda di palasiu, ku tudu utru jinti, sibi kuma N sta prezu pabia di Kristu.

¹⁴ Pabia di ña kalabus, mas parti di ermons na Siñor e ten mas animu pa fala palabra di Deus ku koraẑen, sin medu.

¹⁵ Na bardadi utru delis ta konta Bon Noba di Kristu pabia e ten nveẑa ku spiritu di jus, ma utrus ta fasil di bon vontadi.

¹⁶ Esis e fasil pa amor; e sibi kuma Deus pun pa N difindi Bon Noba.

¹⁷ Ki utrus ka ta konta aserka di Kristu ku korson limpu, ma ku spiritu di kumbosadia. E kuda kuma e na lantanda mas fadiga pa mi na kalabus.

¹⁸ N ka mporta! Na un manera o utru, na finjimentu o na bardadi, suma ke na konta di Kristu, N ta kontenti. N na kontenti mas inda,

¹⁹ pabia N sibi kuma Deus na usa e kusas pa dan ña libertason, suma ku bo na ora pa mi; Spiritu di Jesus Kristu tambi na judan.

²⁰ Ña diseẑu fundu ku ña speransa i pa N ka yara, pa N bin ten motivu di fika ku borgoña, ma pa N pudi ten garandi koraẑen gosi, suma pa sempri, pa garandesa di Kristu pudi ojadu klaru na ña kurpu, si i pa vida o si i pa mortu.

²¹ Ke ki vida? Pa mi, i Kristu; mortu i ngañu,

²² ma si pa N bibu inda N ta pudi fasi mas tarbaju di purbitu, nta N ka sibi ke ku N dibi di kuji.

²³ Di tudu dus ladu N na jundadu. N ten diseẑu di disa e vida pa N sta ku Kristu, pabia i mas minjor,

²⁴ ma pa amor di bos N kuda i mas pirsis pa N fika ku vida.

²⁵ Suma ku N ten e sertesa, N sibi kuma N na bibu inda; N na fika ku bos tudu pa juda bos avansa na fe ku mas alegria,

²⁶ pa ora ku N sta ku bos utru bias, bo pudi ten muitu mas roson di njata na mi na no union ku Kristu Jesus.

Konsiju pa fika firmi

²⁷ Kusa importanti i pa bo manera di vivi sedu dignu di Bon Noba di Kristu, pa nin si N bai jubi bos o nau, N pudi obi kuma bo sta firmi na un sintidu son, bo na geria juntu pa fe di Bon Noba, ku un pensamentu son.

²⁸ Na nada ka bo ten medu di kilis ku sta kontra bos. Es na sedu un sinal pa elis kuma e ten ku pirdi, ma pa bos i sinal di salbason ku Deus na da bos,

²⁹ pabia bo dadu fabur, i ka son pa fia na Kristu, ma tambi pa sufri pa el.

³⁰ Ami ku bos no sta na mesmu gera ku bo ojanba nel, ku gosi bo obi kuma N sta nel inda.