Filemon 1 - BIBLIA - traduson antigu in Krioulo

Kumsada ku manteña

¹ Ami Paulu, prezu pa amor di Kristu Jesus, ku no ermon Timótiu, no skirbi pa no kiridu ermon Filemon, no kumpañer di tarbaju,

² ku no irma Afia, ku Arkipu no kumpañer soldadu, ku igreẑa ku sta na bu kasa.

³ N misti pa Deus no Pape ku Siñor Jesus Kristu da bos fabur ku pas.

Amor ku fe di Filemon

⁴ Kada bias ku N ora, N ta coma bu nomi, N ta fala ña Deus obrigadu,

⁵ pabia N ta obi di bu amor pa tudu pobu di Deus, ku fe ku bu ten na Siñor Jesus.

⁶ N ta ora pa bu sedu forti na mostra bu fe, pa jinti pudi ten kada bias mas bon ntindimentu di tudu benson ku no union ku Kristu ta tisinu.

⁷ Ña ermon, bu amor tisin garandi alegria ku konsolason, pabia bu anima korson di pobu di Deus.

Paulu roga pa Onésimu

⁸ Asin pa e roson, kontudu N ten diritu di mostrau bu dever, suma ermon na Kristu,

⁹ ma N misti pidiu, pabia de amor, mesmu ku N sedu Paulu bejoti, gosi prezu pa amor di Kristu Jesus.

¹⁰ N na rogau pa ña fiju Onésimu ku N padi li na kalabus,

¹¹ ku ka baliba pa bo, ma gosi i bali pa bo i pa mi. N na mandau el,

¹² ma ña korson na bai ku el.

¹³ N mistiba fika ku el pa i sirbin na bu lugar, kontra N sta prezu pabia di Bon Noba,

¹⁴ ma N ka misti obrigau pa bu judan. N misti pa bu fasil na bu libri vontadi. Asin N ka na fasi nada si bu ka konkorda.

¹⁵ I pudi sedu ki separaba di bo pa un tempu, pa bu pudi bin tenel pa tudu tempu.

¹⁶ Gosi ja i ka suma katibu, ma mas di ki asin, suma ermon ku bu ama. Ami N amal ciu; ku fadi abo, suma bu algin ma tambi suma ermon na Siñor.

¹⁷ Si bu tenen suma kumpañer, risibil suma mi propi.

¹⁸ Si i fasiu kualker danu, o i dibiu un kusa, lansal na ña konta.

¹⁹ Ali N na skirbi ku ña propi mon: Ami Paulu N na pagau. N ka pirsisa di falau kuma bu dibin bu propi kabesa.

²⁰ Asin ermon, fasin e fabur pa amor di Siñor, bu dan animu suma ña ermon na Kristu.

²¹ N skirbiu ku fiansa kuma bu na fasi kil ku N pidiu. Bardadi N sibi kuma bu na fasi inda mas.

²² N na pidiu mas un kusa, pa bu pruntia kuartu pa mi, pabia N spera kuma Deus na ruspundi bo orason, i na mandan pa bos.

Manteña di kabantada

²³ Epafras, ku sta ku mi na kalabus pa amor di Kristu Jesus, i mandau manteña,

²⁴ suma tambi Markus, Aristarku, Demas ku Lukas, ña kumpañeris na tarbaju.

²⁵ Fabur di Siñor Jesus Kristu ta sta ku bo spiritu. Amen.