Ezekiel 8 - BIBLIA - traduson antigu in Krioulo

Kusas nujenti na kau sagradu

¹ Na dia 5 di sestu mis di sestu anu, oca ku N sinta na ña kasa, garandis di Judá sinta juntu ku mi, mon di SIÑOR Deus bin riba di mi.

² N jubi, N oja un figura suma omi di fugu. Desdi si sintura pa bas i seduba di fugu; di sintura pa riba i na lampra suma metal pulidu.

³ I distindi kusa ku parsi ku mon, i pañan na kabelu di ña kabesa. Na un vison di Deus, Spiritu lantandan entri tera ku seu, i leban pa Jerusalen, te na entrada di porta di kintal di dentru ku ta fika na ladu di norti, nunde ki puduba un imaẑen di siumi ku pui Deus pa i sinti siumi.

⁴ N oja gloria di Deus di Israel la, suma na ki vison ku N oja na kobon.

⁵ I falan: “Fiju di omi, jubi pa ladu di norti.” N jubi pa norti; la na entrada di banda di norti, na porta pertu di altar, i staba ki imaẑen di siumi.

⁶ I puntan: “Fiju di omi, bu oja ke ke na fasi? Bu oja e garandi kusas nujenti ku pobu di Israel na fasi li, pa lunjusin di ña kau sagradu? Bu na oja kusas inda mas nujenti.”

⁷ I leban pa porta di kintal. N jubi, N oja la un buraku na paredi.

⁸ I falan: “Fiju di omi, koba na ki paredi.” N koba na paredi, N oja un porta la.

⁹ I falan: “Yentra, bu jubi maldadis ku kusas nujenti ke fasi la.”

¹⁰ N yentra N jubi. I staba la, pintadu na roda di paredi, tudu tipu di limaria ku ta rasta, ku limarias nujenti, ku tudu idulus di pobu di Israel.

¹¹ Setenta omi garandi di Israel, ku Jazanias, fiju di Safan, na se metadi, e firmaba dianti di ki pinturas. Kada kin teneba si nsensariu na mon; fumu di nsensu na lanta suma nuven.

¹² I puntan: “Fiju di omi, bu oja ke ku garandis di Israel na fasi na sukuru, kada un na si kuartu pintadu ku imaẑens? E na fala: ‘SIÑOR ka na ojanu; i bandona tera.’ ”

¹³ I falan: “Bu na oja kusas mas nujenti di ki es ku na fasidu li.”

¹⁴ I leban pa entrada di porton di norti di kasa di SIÑOR. N oja minjeris sintadu la; e na cora pa Tamuz.

¹⁵ I puntan: “Fiju di omi, bu oja? Ma bu na oja kusas inda mas nujenti di ki es.”

¹⁶ I leban pa kintal di dentru di kasa di SIÑOR. La, pertu di entrada di kau sagradu, entri sala di entrada ku altar, serka di vinti i sinku omi, ku vira kosta pa kau sagradu di SIÑOR, ku se rostu pa saida di sol, e na adora sol ku na lanta.

¹⁷ I puntan: “Fiju di omi, bu oja es? Nta e kusas nujenti ku pobu di Judá na fasi li i kusa pikininu pa elis? E ten ku bai dianti, e inci tera ku violensia pa fasin paña raiba. Jubi elis e na ciganta ramu pa se naris!

¹⁸ Asin N na trata elis ku raiba. N ka na sinti pena delis; N ka na purda elis. Nin ke grita risu na ña oreja, N ka na obi elis.”