Ezekiel 7 - BIBLIA - traduson antigu in Krioulo

Kabantada na bin

¹ SIÑOR bin papia ku mi, i falan:

² “Fiju di omi, asin ku SIÑOR Deus fala aserka di tera di Israel: Kabantada na bin pa tudu kuatru kantu di tera.

³ Kabantada sta riba di bo, pabia N na larga ña raiba riba di bo, N na julgau konformi kusas ku bu fasi; N na pui bu kustumus nujenti pa e kai riba di bo.

⁴ N ka na jubiu ku pena, nin N ka na purdau. N na pui kusas ku bu fasi, ku kustumus nujenti ku sta na bo metadi, pa e kai riba di bos. Asin bo ta sibi kuma ami i SIÑOR.”

⁵ Asin ku SIÑOR Deus fala: “Mal na bin tras di ŋutru.

⁶ Kabantada na bin! Kabantada na bin! I lanta kontra bo; ala i na bin!

⁷ Abo ku mora na tera, kondenason na bin pa bo. Tempu na bin; dia di kunfuson ciga riba di montis; kontentamentu ka ten ja.

⁸ Gosi N ka na tarda; N na darma ña raiba tok N kabal na bo. N na julgau konformi kusas ku bu fasi; N na pui tudu bu kustumus nujenti pa e kai riba di bu kabesa.

⁹ “N ka na jubiu ku pena, nin N ka na purdau. N na pui kusas ku bu fasi, ku kustumus nujenti ku sta na bo metadi, pa e kai riba di bos. Asin bo ta sibi kuma i ami, SIÑOR, ku ta kastiga.

¹⁰ “Dia ciga; ali i na bin. Bu kondenason ciga. Bingala di violensia flora ja; orgulyu sta pruntu pa padi si frutu.

¹¹ Violensia bin kirsi tok i sedu bingala di maldadi. Nada ka na sobra delis, nin se rikesa, nin se gloria; ningin ka na cora elis.

¹² Tempu na bin; dia ciga ja. Kil ku kumpra pa ka i kontenti; kil ku bindi pa ka i fika tristi, pabia raiba forti i sta riba delis tudu;

¹³ Kil ku bindi si terenu i ka na torna tenel nkuantu el ku ki kumpradur e sta di vida, pabia anunsiu aserka di tudu ki multidon ka na maina. Pabia di pekadu ningin ka na pudi salba si vida.

¹⁴ E toka ja korneta; tudu jinti purpara, ma i ka ten kin ku na bai pa gera, pabia ña raiba na yardi kontra tudu ki multidon.

¹⁵ “Spada sta la fora; dentru i ten fomi ku duensa. Kil ku sta na matu i na muri ku spada; kil ku sta na prasa, fomi ku duensa na kaba ku el.

¹⁶ Kilis ku kuri e kapli, e na sta na montis, suma pumbas di kobon. Kada kin na jimi pabia di si maldadi.

¹⁷ Tudu mon na pirdi forsa; tudu juju na moli suma yagu.

¹⁸ E na bisti saku, e na tirmi desdi kabesa te na pe. Se rostu na kubridu ku borgoña; se kabelu na rapadu tudu.

¹⁹ E na bota se prata na rua; se uru na sedu suma susidadi. Nin se prata nin se uru ka na pudi libra elis na dia di raiba di SIÑOR. E ka pudi usal pa mata se fomi nin pa inci se stomagu, pabia i el propi ku pui elis pa e kai na pekadu.

²⁰ E sinti garandi orgulyu pa kil se joias bonitu, ma e toma elis, e kumpu imaẑens ku idulus nujenti. E ku manda N torna ki rikesa suma susidadi pa elis.

²¹ N na disa stranjerus ku jinti mau pa e furtal, pa e kontaminal.

²² N na sukundi ña rostu delis. Ladrons na yentra na ña kau sagradu, e na kontaminal.

²³ “Ranja korentis, pabia tera inci krimis di sangi; prasa inci ku violensia.

²⁴ N na tisi ki nasons mas pior pa e bin roba se kasas; N na kaba ku orgulyu di ki omis forti; se kaus sagradu na kontaminadu.

²⁵ Ora ku danu bin pa elis, e na buska pas, ma e ka na ojal.

²⁶ Mufunesa na bin riba di mufunesa; mau nobas na bin tras di utru. E na misti pa anunsiadur konta elis ke ku sedu, ma saserdotis ka na tene nsinamentu di lei pa elis, nin garandis ka na pudi da elis konsiju.

²⁷ Rei na cora, fiju di rei na pirdi speransa; mon di pobu na tirmi. N na trata ku elis konformi kusas ke fasi; N na julga elis manera ke ta julga utrus. E na sibi kuma ami i SIÑOR.”