Ezekiel 4 - BIBLIA - traduson antigu in Krioulo

Ezekiel mostra kuma ku Jerusalen na tajadu

¹ “Abo, fiju di omi, toma un tagua di lama, bu pul bu dianti, bu grava prasa di Jerusalen nel.

² Pa mostra kuma i na tajadu, bu na kumpu toris di bisia kontra el, ku rampas di kamba, bu na kumpu kampamentus kontra el, tudu na roda bu na pui pos forti pa batil ku el.

³ Bu na toma un friẑidera rasu, di feru, bu pul suma mura di feru na metadi di bo ku prasa, bu vira rostu pa el. Asin prasa na tajadu; abo ku na tajal. Es i na sedu sinal pa pobu di Israel.

⁴ “Dita na bu ladu skerda, bu pui maldadi di pobu di Israel riba di bo. Bu na leba se maldadi pa numeru di dias ku bu dita na bu ladu.

⁵ N marka pa bo mesmu numeru di dias suma anus di se maldadi. Asin bu na leba maldadi di Israel pa trizentus i noventa dia.

⁶ “Ora ku bu kompleta ki dias, bu na vira pa ladu direita. Bu na leba maldadi di pobu di Judá pa korenta dia; N dau un dia pa kada anu.

⁷ Vira rostu pa tajamentu di Jerusalen, bu distindi bu brasu nun, bu anunsia kontra el.

⁸ Ami N na marau ku korda pa bu ka pudi vira di un ladu pa utru tok bu kompleta dias di bu tajamentu.

⁹ “Toma trigu, sevada, fison, lentilias, miju ku aveia, bu pui elis na un tiẑela, bu fasi pon. Bu na kumel na trizentus i noventa dia ku bu dita na bu ladu.

¹⁰ Kumida ku bu na kume kada dia i na sedu duzentus i trinta grama; bu na kumel na oras sertu.

¹¹ Tambi yagu ku bu na bibi, bu na midil, bu bibi dus kopu kada dia, na oras sertu.

¹² Kil ku bu na kume i na sedu suma bulus di sevada. Bu na sindi fugu ku fezis di omi, bu na kusñal dianti di tudu jinti.”

¹³ SIÑOR fala: “Asin ku fijus di Israel na kume se pon kontaminadu ora ke serkadu na metadi di nasons.”

¹⁴ N falal: “Ai, SIÑOR, SIÑOR! Nunka N ka kontamina, pabia N ka kume kusa ku muri, nin kusa sapa-sapadu, disna ku N lanta te gosi, nin karni ku ka sta konformi lei ka yentra na ña boka.”

¹⁵ I falan: “Mbon, N na disau kumpu pon riba di bosta di baka na lugar di fezis di omi.”

¹⁶ Dipus i falan: “Fiju di omi, N na korta sustentu di pon na Jerusalen. E na pesa pon ke na kume, ku kudadi, e na midi yagu ke na bibi, ku medu,

¹⁷ pabia pon ku yagu na fasi elis falta. Si e jubi kurpu di ŋutru, e na panta. Kurpu na kaba ku elis pabia di pekadu.”