Ezekiel 2 - BIBLIA - traduson antigu in Krioulo

Deus coma Ezekiel

¹ I falan: “Fiju di omi, lanta bu firma; N na papia ku bo.”

² Oca ki na papiaba ku mi, Spiritu yentra na mi, i lantandan. N obi algin ku na papiaba ku mi.

³ I falan: “Fiju di omi, ami N na mandau pa fijus di Israel, nason disobdienti ku nega obin; elis ku se papes e lanta kontra mi te aos.

⁴ Esis ku N na mandau pa elis e risu kabesa, ntemus na korson. Bu na fala elis: ‘Asin ku SIÑOR Deus fala.’

⁵ E na sibi kuma un anunsiadur staba na se metadi, nin si e misti obi o e ka misti obi, pabia e sedu disobdienti.

⁶ Abo, fiju di omi, ka bu ten medu delis, ku fadi medu di se palabra, nin ke sedu suma fidida pa bo, suma bu sinta ku lakaran. Ka bu medi se palabras, nin pa e pantandau ku se rostu, pabia e sedu disobdienti.

⁷ Konta elis ña palabra, nin si e obi o e ka misti obi, pabia e sedu disobdienti.

⁸ Abo, fiju di omi, pui sintidu, bu obi ke ku N na falau. Ka bu sedu disobdienti suma elis. Yabri bu boka, bu kume ke ku N na dau.”

⁹ N jubi, N oja un mon ku distindi pa mi, ku pega rolu di libru.

¹⁰ I disrolal ña dianti; i staba skritu dentru ku fora ku miskiñu, ku kantiga di cur ku tristesa.