Ezekiel 1 - BIBLIA - traduson antigu in Krioulo

Vison di kirubins

¹ Na dia 5 di kuartu mis di anu 30, oca ku N staba na metadi di katibus lungu di riu Kebar, seu yabri, N oja visons di Deus.

² Na dia 5 di mis, na kintu anu di katiberasku di rei Joakin,

³ SIÑOR bin papia ku saserdoti Ezekiel, fiju di Buzi, na tera di Babilonia, lungu di riu Kebar. Mon di SIÑOR staba riba del.

⁴ N jubi, N oja un turbada di bentu ku na bin di norti, ku un nuven garandi, ku raius di relampagu ku garandi lus na si roda. Na si metadi i tenba un kusa ku na lampraba suma metal dentru di fugu.

⁵ Dentru del i tenba kil ku parsi ku kuatru kriatura bibu ku teneba forma suma omi.

⁶ Kada un teneba kuatru rostu ku kuatru asa.

⁷ Se pernas staba filadu; patas di se pe seduba suma pe di fiju di baka; e na lampraba suma kobri pulidu.

⁸ E teneba mon di omi bas di kada un di se asas na ki kuatru ladu. Asin tudu kuatru teneba se rostus ku se asas.

⁹ Se asas ta tokaba na ŋutru. E ka ta vira ora ke na yanda; kada kin ta yandaba dianti di si rostu.

¹⁰ Se rostus seduba asin: kada un teneba rostu di omi; na si mon direita i teneba rostu di lion; na mon skerda i teneba rostu di turu; i teneba tambi rostu di agia. Asin ku se rostus seduba.

¹¹ Dus di se asas distindidu pa riba; kada un ta toka na ponta di asa di si kumpañer. Ku ki utru dus asa e kubri se kurpu.

¹² Kada kin ta yandaba pa dianti. Kau ku spiritu misti bai, e ta bai. Ora ke na yanda, e ka ta vira.

¹³ Parsensa di ki kriaturas bibu i seduba suma karbon ku na yardi, o suma toŝa. Fugu ta kuriba pa dianti ku tras na metadi di kriaturas. Ki fugu ta lampra ku forsa; raius ta sai nel.

¹⁴ Ki kriaturas ta kuri pa dianti ku tras, suma raius di relampagu.

¹⁵ Oca ku N jubi ki kriaturas bibu, N oja un roda na con na ladu di kada un.

¹⁶ Parsensa di rodas sedu asin: e na lampra suma ki pedra di balur ku comadu turkesa; tudu kuatru e seduba mesmu. Manera ke kumpudu i seduba suma un roda ku sta dentru di utru.

¹⁷ Ora ke na yanda, e pudi bai pa kualker ladu, ma rodas ka ta kurva.

¹⁸ Ki rodas seduba altu, meduñu; tudu kuatru teneba arkus ku inci uju na se roda.

¹⁹ Ora ku ki kuatru kriatura bibu na yandaba, rodas ta yanda juntu ku elis. Si kriaturas lanta na con, rodas tambi ta lanta.

²⁰ Kau ku spiritu misti bai, ki kriaturas ta bai la; rodas tambi ta lanta juntu ku elis, pabia spiritu di kriaturas bibu staba na rodas.

²¹ Ora ku kriaturas bibu na yanda, rodas tambi na yanda; ora ke para, rodas tambi ta para. Si e lanta na con, rodas tambi ta lanta juntu ku elis, pabia spiritu di kriaturas bibu staba na rodas.

²² Riba di kabesa di kriaturas bibu i tenba un kusa distindidu ku parsi ku seu, meduñu, suma jelu ku na lampra.

²³ Bas di ki seu, ki kriaturas distindi se asas pa toka na asas di se kumpañeris; kada un teneba mas dus asa pa kubri si kurpu.

²⁴ Oca ke na yanda, N obi baruju di se asas suma baruju di korenti di yagu, suma fála di Deus ku ten tudu puder, o suma baruju di manga di tropa. Si e para, e ta baŝaba se asas.

²⁵ I bin un fála riba di ki seu ku staba riba di se kabesa, oca ke staba paradu ku asas baŝadu.

²⁶ Riba di ki seu i tenba un kusa ku parsi tronu ku kumpudu di pedra di balur ku comadu safira. Sintadu la riba di tronu i tenba kil ku parsi ku omi.

²⁷ N oja di si sintura pa riba i parsiba ku metal ku na lampra, suma fugu sta dentru del; di la pa bas N oja suma fugu, ku lus ku na lampra na si roda.

²⁸ Ki lus na roda i parsiba ku arku-iris ku ta sai na nuven na tempu di cuba. Asin ku parsensa di gloria di SIÑOR seduba. Oca ku N ojal, N kai ku rostu na con, N obi vos di algin ku na papiaba.