Ester 4 - BIBLIA - traduson antigu in Krioulo

Mardokeu pidi ajuda di Ester

¹ Oca Mardokeu bin sibi tudu ke ku pasa, i rumpi si ropa, i bisti saku, i pui sinsa na kabesa, i sai na metadi di prasa, i na grita risu ku dur.

² I ciga son te na porton di rei, pabia algin ku bisti saku ka pudi yentra dentru.

³ Na tudu ki pruvinsias nunde ku ki ordi di rei ciga, i tenba garandi kasabi na metadi di judeus. E junjuŋa, e cora, e miskiña; manga delis dita na saku ku sinsa.

⁴ Oca bajudas ku funsionarius di Ester kontal aserka di Mardokeu, raiña fika ku garandi dur. I manda ropa pa Mardokeu bisti, pa tiral ki saku, ma el i nega risibi elis.

⁵ Ester coma Atak, un funsionariu ku rei puiba na sirvis di raiña, i mandal pa i bai sibi ke ku na pasaba ku Mardokeu, i pabia di ke.

⁶ Atak bai pa Mardokeu na kau publiku di prasa dianti di porton di rei.

⁷ Mardokeu kontal tudu ke ku kontisi ku el, suma tambi kuantia di prata ku Aman fala i na pui na kofri di rei pa kaba ku tudu judeus.

⁸ Tambi i dal un kopia di ki lei ku skirbidu, i publikadu na Susan, pa kaba ku judeus; i falal: “Mostra raiña Ester el, bu splikal; tambi bu ta mandal pa i bai pa rei, i roga, i pidil pa i ten miserikordia di si pobu.”

⁹ Atak riba i konta Ester tudu palabra ku Mardokeu falal.

¹⁰ Ester manda Atak pa i bai fala Mardokeu:

¹¹ “Tudu servus di rei ku pobu di si pruvinsias e sibi diritu kuma, kualker omi o minjer ku yentra nunde rei, na ki kau dentru di si jardin, sin i ka comadu, i ten un lei son; ki algin na muri, son si rei distindi pa el ki bingala di uru, pa salba si vida. Ma i pasa ja trinta dia ku N ka comadu pa yentra nunde rei.”

¹² Oca palabra di Ester kontadu pa Mardokeu,

¹³ i manda Ester e rasposta: “Ka bu pensa kuma bu ten speransa di kapli la na kasa di rei mas di ki tudu judeus,

¹⁴ pabia, si bu kala boka ne tempu, ajuda ku libertason na bin pa judeus di utru ladu, ma bu na muri, tudu ku familia di bu pape. Kin ku sibi? Talves i pa un tempu suma es ku manda bu sedu raiña.”

¹⁵ Ester da rasposta pa e leba pa Mardokeu, e falal:

¹⁶ “Bai, bu junta tudu judeus ku sta na Susan, bo junjuŋa pa mi; ka bo kume nin bibi pa tris dia, nin di dia nin di noti. Asin ku ami ku ña bajudas tambi no na junjuŋa. Dipus N na bai nunde rei, mesmu ki ka sedu konformi lei. Si i pa N muri, N ta muri.”

¹⁷ Asin Mardokeu bai i fasi tudu konformi Ester mandal.