Esdras 6 - BIBLIA - traduson antigu in Krioulo

Rei Dariu konfirma ordi di Siru

¹ Rei Dariu da ordi; jinti bai buska na kau nunde ku kusas importanti di Babilonia ta mitiduba.

² La na palasiu di Akmetá, na pruvinsia di Media, e bin oja un rolu ku skirbiduba nel kusas di lembransa ku fala asin:

³ “Na purmeru anu di si renansa, rei Siru da e ordi aserka di kasa di Deus na Jerusalen. Ki kasa na kumpudu pa i sedu un lugar nunde ku sakrifisius ta pursentadu. Si alisersu na sedu firmi. Kasa na tene 27 metru di altura ku 27 metru di largura.

⁴ I na tene tris renku di pedras garandi ku un renku di madera nobu. Dispesas na sai na finansas di kasa di rei.

⁵ Tambi ki vasus di uru ku di prata di kasa di Deus ku Nabukodonosor tira na templu na Jerusalen i leba pa Babilonia, e na ntregadu, pa e pudi lebadu pa se lugar na templu di Jerusalen, kada un pa si kau na kasa di Deus.”

⁶ Asin rei Dariu manda e rasposta: “Tatenai, gubernadur di Trans-Eufrates, Setar-Boznai ku se kolegas, ŝefis di pruvinsia, bo fika lunju di ki kau;

⁷ bo disa elis na obra di ki kasa di Deus, pa gubernadur di judeus ku se garandis pudi kumpu kasa di Deus na kau ki staba nel.

⁸ Tambi N na da ordi pa bo pudi sibi ke ku bo na fasi pa garandis di judeus, pa e pudi kumpu ki kasa. Pa obra ka para, dispesas di ki omis ten ku pagadu na tempu sertu, di finansas di rei, di mpustus ku na pagadu la na Trans-Eufrates.

⁹ Kil ku pirsisadu, suma bakasiñus, karnelis macu, fijus di karnel pa ofertas kemadu pa Deus di seu, trigu, sal, biñu ku azeiti, konformi saserdotis na Jerusalen pidi bos, e ta dadu, kada dia, pa nada ka falta elis,

¹⁰ pa e pudi pursenta sakrifisius ku ta cera sabi pa Deus di seu, pa e ora pa vida di rei ku si fijus.

¹¹ “N na da utru ordi tambi kuma, si kualker omi muda e lei, un po ten ku rinkadu na si kasa, pa el i yalsadu i pindradu nel; si kasa tambi na sedu kau di muntudu.

¹² Asin Deus, ku pui si nomi na ki kasa, i ta durba kualker rei o pobu ku yalsa mon pa muda e lei o pa dana ki kasa di Deus na Jerusalen. Ami, Dariu, ku da es ordi. I ten ku pudu na pratika disna di aos.”

Templu kaba, i dedikadu

¹³ Tatenai, gubernadur di Trans-Eufrates, ku Setar-Boznai ku se kolegas, e janti e fasi tudu konformi ki ordis di rei Dariu.

¹⁴ Garandis di judeus bai dianti ku obra; kusas kuri elis diritu. Anunsiadur Aẑeu ku anunsiadur Zakarias, fiju di Idu, e na anunsiaba. Asin e kumpu kasa, e kabantal, konformi Deus di Israel manda elis, tambi konformi ordis di Siru, Dariu ku Artaserksis, reis di Persia.

¹⁵ Kasa kaba na dia 3 di mis di Adar, na sestu anu di renansa di rei Dariu.

¹⁶ Dipus, fijus di Israel, saserdotis ku levitas ku tudu jinti ku binba di katiberasku, e dedika kasa di Deus ku kontentamentu.

¹⁷ Pa dedikason e sakrifika sen turu, duzentus karnel macu, kuatrusentus fiju di karnel, ku dozi kabra macu, un pa kada jorson di Israel, suma oferta pa purdon di pekadu di tudu Israel.

¹⁸ E fasi skala pa saserdotis ku grupus di levitas pa e pudi sirbi dianti di Deus na Jerusalen, kada kin na si dia, konformi kil ku sta skritu na libru di Moisés.

Festival di Paskua

¹⁹ Na dia 14 di purmeru mis, kilis ku riba di katiberasku e guarda festival di Paskua.

²⁰ Saserdotis ku levitas, suma un omi son, e fasiba ja sirmonia di purifikason; asin elis tudu e staba puru. Levitas mata karnelsiñus di Paskua pa tudu jinti ku ribaba di katiberasku, pa se ermons, saserdotis, suma tambi pa se kabesa.

²¹ Asin, fijus di Israel ku ribaba di katiberasku e kumel, juntu ku tudu kilis ku negaba kustumus susu di utru jinti ku moraba na tera di Judá, pa e pudi buska SIÑOR, Deus di Israel.

²² Pa seti dia e guarda festival di pon sin fermentu ku kontentamentu, pabia SIÑOR pui elis pa e kontenti, manera ki muda korson di rei di Asiria pa i mostra elis fabur, i juda elis na obra di kasa di Deus di Israel.