Esdras 4 - BIBLIA - traduson antigu in Krioulo

Samaritanus lanta kontra obra

¹ Inimigus di Judá ku Benjamin e obi kuma kilis ku riba di katiberasku na kumpuba templu pa SIÑOR Deus di Israel.

² E ciga nunde Zorobabel ku ŝefis di familia, e fala elis: “Bo disanu pa no tarbaja juntu ku bos, pabia anos i suma bos; no ta buska bo Deus, no ta sakrifika pa el disna di tempu di Esar-Adon, ki rei di Asiria ku mandanu pa li.”

³ Zorobabel, Jesua, ku utru ŝefis di familia di Israel, e fala elis: “I ka bon pa bo junta ku nos pa kumpu kasa pa no Deus. Anos son ku na kumpu kasa pa SIÑOR Deus di Israel, suma ku Siru, rei di Persia, mandanu.”

⁴ Di la, ki jinti ku tardaba na ki tera e fika e na buska manera di pui pobu di Judá pa e disanima, pa e sinti medu di bai dianti ku tarbaju.

⁵ E paga konsijaduris di gubernu pa e tarbaja kontra elis, pa dana se planus, tudu tempu ku Siru na renaba na Persia, te na tempu di Dariu, rei di Persia.

⁶ Oca ku Asueru kumsa na rena, inimigus skirbi kartas pa akusa kilis ku moraba na Judá ku Jerusalen.

⁷ Tambi, na tempu di Artaserksis, rei di Persia, Bislan, Mitredat, Tabeel ku se kumpañeris e skirbi pa el. Karta staba na lingua aramaiku, i skirbidu na letras aramaiku.

⁸ Dipus, gubernadur Reun, ku sekretariu Sinsai, e skirbi un karta pa rei Artaserksis, kontra Jerusalen, e fala:

⁹ “Karta di gubernadur Reun ku sekretariu Sinsai, ku utrus di se kolegas — juisis ku ŝefis, ku omis di Tripolis, Persia, Erek, Babilonia ku Susan na tera di Elan,

¹⁰ ku utru rasas ku Osnapar, ki garandi omi di fama, transporta pa e pudi mora na prasa di Samaria ku utru lugaris di pruvinsia di Trans-Eufrates.”

¹¹ Asin ke skirbi na se karta: “Pa Rei Artaserksis, di bu servus, omis di Trans-Eufrates:

¹² “Rei dibi di sibi kuma ki judeus ku sai nunde bo, e bin pa nos na Jerusalen, e na kumpu ki prasa rebeldi, malvadu, e torna pui alisersu, e na kumpu muras.

¹³ Rei dibi di ntindi kuma, si ki prasa kumpudu, tudu ku si muras, e na para paga taŝas ku mpustu ku renda; asin finansas di rei na pirdi.

¹⁴ Suma ku no ta risibi no sustentu di palasiu, i ka bon pa no seta pa rei njutidu; asin no na manda avisa rei,

¹⁵ pa algin pudi buska na libru di storia di bu papes. Si bu lei na ki libru, bu na oja kuma ki prasa seduba rebeldi, i ta kansaba reis ku ŝefis di pruvinsias. Sempri i ta tenba rebelion la disna di tempu antigu. E ku manda ki prasa danaduba.

¹⁶ Asin, no misti konta rei kuma, si ki prasa lantandadu mas, si si muras kaba kumpudu, bu ka na tene nada ne banda di riu.”

¹⁷ Rei manda e rasposta: “Pa Reun, gubernadur, ku sekretariu Sinsai, ku tudu se kumpañeris ku mora na Samaria ku utru lugaris di Trans-Eufrates: manteñas.

¹⁸ “Ki karta ku bo mandanu i leidu klaru ña dianti.

¹⁹ N da ordi; jinti bai buska, e oja kuma, disna di tempu antigu, ki prasa ta lantaba kontra reis. Sempri i teneba rebeldis ku jinti ku staba kontra otridadis.

²⁰ Tambi na Jerusalen i tenba reis forti ku ta mandaba riba di tudu teras di Trans-Eufrates; e ta risibiba taŝas ku mpustu ku rendas.

²¹ Asin, bo da ordis pa ki omis para kumpu ki prasa te ora ku N da utru ordi.

²² Bo pui sintidu pa bo ka yara ne kusa, pa reis ka pirdi forsa, nin pa se finansas ka fraksi.”

²³ Oca ku un kopia di karta di rei Artaserksis leidu dianti di Reun, ku sekretariu Sinsai ku se kumpañeris, e janti pa Jerusalen, e usa violensia pa obriga judeus pa e para tarbaju.

²⁴ Obra di kasa di Deus na Jerusalen para te na sugundu anu ku Dariu na renaba riba di Persia.