Esdras 10 - BIBLIA - traduson antigu in Krioulo

Israelitas ripindi

¹ Oca ku Esdras na oraba asin, i na konfesa pekadu, i na cora, mborkadu dianti di kasa di Deus, multidon di israelitas junta lungu del, omis ku minjeris ku mininus; e na coraba risu.

² Sekanias, fiju di Jeiel, di familia di Elan, i fala Esdras: “No kebra lei di no Deus manera ku no kasa ku minjeris stranjeru, ma inda asin speransa ten pa Israel.

³ No na fasi kontratu ku no Deus ku no na dispidi tudu ki minjeris, ku tudu fijus ke padi. No na fasi konformi konsiju ku bu danu, ku konsiju di kilis ku ta rispita mandamentu di no Deus. Tudu ten ku fasidu konformi lei.

⁴ Asin, bu pudi lanta; i abo ku na trata asuntu, ma no sta ku bo. Mara koraẑen, bu toma midida.”

⁵ Esdras lanta, i pui ŝefis di saserdoti ku levitas ku tudu Israel pa e jurmenta kuma e na fasi kil ku Sekanias fala. E jurmenta.

⁶ Esdras sai na kau ki staba nel dianti di kasa di Deus, i yentra na kuartu di Joanan, fiju di Eliasib . Ocal la, i ka kume nada nin i ka bibi yagu, pabia i sinti kasabi dimas manera ku jinti ku ribaba di katiberasku e kebra lei di Deus.

⁷ E manda ordi pa tudu tera di Judá ku Jerusalen pa tudu kilis ku ribaba di katiberasku bai junta na Jerusalen.

⁸ Ordi fala kuma, si algin ka bin dentru di tris dia, konformi palabra di ŝefis ku garandis, i pudi tiradu tudu si kusas; i ta fika fora di se kumunidadi.

⁹ Asin, dentru di tris dia, tudu omis di Judá ku Benjamin e junta na Jerusalen. Na dia 20 di nonu mis, tudu jinti sinta na kintal di kasa di Deus. E na tirmiba pabia di asuntu ku na tratadu, tambi pabia di cuba ku na kaiba ku forsa.

¹⁰ Saserdoti Esdras lanta, i fala elis: “Bo kebra lei, bo kasa ku minjeris stranjeru; bo buri kulpa riba di Israel.

¹¹ Gosi bo pudi konfesa bo pekadu pa SIÑOR Deus di bo papes, bo fasi si vontadi, bo separa di pobu de tera ku minjeris stranjeru.”

¹² Tudu juntamentu di pobu ruspundi e fala ku vos altu: “I bardadi; no na fasi kil ku bu falanu.”

¹³ Dipus e fala: “Ma anos no ciu; tambi no sta na tempu di cuba; no ka pudi fika li fora. Es i ka tarbaju di un dia nin di dus, pabia manga di nos kebra lei de manera.

¹⁴ No ŝefis pudi fika li na konta di tudu pobu; la na no prasas kualker omi ku kasa minjer stranjeru pudi bin na tempu markadu, tudu ku garandis ku juisis di si prasa. Asin, raiba ku na yardi na no Deus pabia de kusa i pudi fria.”

¹⁵ Ningin ka staba kontra e planu si i ka Jonatas, fiju di Asael, ku Jazeias, fiju di Tikvá; tambi Mesulan ku ki levita Sabetai e ka konkorda ku ki planu.

¹⁶ Asin kilis ku riba di katiberasku seta ki planu. Saserdoti Esdras kuji omis, kabesas di familia; se nomis skirbidu. Na dia 1 di desimu mis e sinta pa trata ki asuntu.

¹⁷ Purmeru dia di purmeru mis ciga oca ke kababa ja trata kasu di tudu omis ku kasaba minjeris stranjeru.

Omis ku kasaba minjeris stranjeru

¹⁸ Kilis di familias di saserdotis ku kasaba minjeris stranjeru e seduba: Di fijus di Jesua, fiju di Jozadak, ku si ermons: Maaseias, Eliezer, Jarib ku Jedalias.

¹⁹ E da se mon pa fala kuma e na dispidi se minjeris; e seta kulpa, e sakrifika un karnel macu di koral pa se kulpa.

²⁰ Di jorson di Imer: Anani ku Zebadias.

²¹ Di jorson di Arin: Maaseias, Elias, Semaias, Jeiel ku Uzias.

²² Di jorson di Pasur: Elioenai, Maaseias, Ismael, Netanel, Jozabad ku Elasa.

²³ Di levitas: Jozabad, Simei, Kelaias (ku sedu Kelita), Petaias, Judá ku Eliezer.

²⁴ Di kantaduris: Eliasib. Di porterus: Salun, Telen ku Uri.

²⁵ Utru jinti di Israel: Di jorson di Parós: Ramias, Izias, Malkias, Miamin, Eleazar, Malkias ku Benaia.

²⁶ Di jorson di Elan: Matanias, Zakarias, Jeiel, Abdi, Jeremot ku Elias.

²⁷ Di jorson di Zatu: Elioenai, Eliasib, Matanias, Jeremot, Zabad ku Aziza.

²⁸ Di jorson di Bebai: Joanan, Ananias, Zabai ku Atlai.

²⁹ Di jorson di Bani: Mesulan, Maluk, Adaias, Jasub, Seal ku Jeremot.

³⁰ Di jorson di Paat-Moab: Adna, Kelal, Benaia, Maaseias, Matanias, Bezaleel, Binui ku Manasés.

³¹ Di jorson di Arin: Eliezer, Isijá, Malkias, Semaias ku Simeon,

³² Benjamin, Maluk ku Semarias.

³³ Di jorson di Asun: Matenai, Matatá, Zabad, Elifelet, Jeremai, Manasés ku Simei.

³⁴ Di jorson di Bani: Maadai, Anran, Uel,

³⁵ Benaia, Bedeias, Kelui,

³⁶ Vanias, Meremot, Eliasib,

³⁷ Matanias, Matenai, Jaasai,

³⁸ Bani, Binui, Simei,

³⁹ Selemias, Natan, Adaias,

⁴⁰ Maknadebai, Sasai, Sarai,

⁴¹ Azarel, Selemias, Semarias,

⁴² Salun, Amarias ku José.

⁴³ Di jorson di Nebu: Jeiel, Matitias, Zabad, Zebina, Jadai, Joel ku Benaia.

⁴⁴ Tudu ki omis kasaba minjeris stranjeru. Utrus padiba fijus ku elis.