Esdras 1 - BIBLIA - traduson antigu in Krioulo

Siru disa judeus riba pa Jerusalen

¹ Na purmeru anu di Siru, rei di Persia, SIÑOR kumpri ki palabra ki falaba na boka di Jeremias; i disperta spiritu di Siru. Asin Siru da un ordi ku skirbidu, i mandadu pa tudu si renu, i kontadu pa tudu jinti. Ordi fala asin:

² “Es i palabra di Siru, rei di Persia: SIÑOR Deus di Seu dan tudu renus di mundu, i nkargan pa N kumpul un kasa na Jerusalen, na Judá.

³ Kualker na bo metadi ku sedu di si pobu, si Deus ta sta ku el; i ta bai pa Jerusalen na Judá pa kumpu kasa di SIÑOR Deus di Israel, ki Deus ku ta sta na Jerusalen.

⁴ Kualker judeu ku sta inda di vida, na kualker lugar nunde ki mora, si i na bai, omis di ki kau na judal ku prata, uru, ku utru kusas pa bias, ku limarias, fora di ofertas ke misti da pa kasa di SIÑOR ku sta na Jerusalen.”

⁵ Asin, ŝefis di familia di jorsons di Judá ku Benjamin, ku saserdotis, levitas, ku tudu jinti ku Deus disperta se spiritu, e lanta pa bai kumpu kasa di SIÑOR na Jerusalen.

⁶ Tudu se visiñus juda elis ku kusas di prata ku uru, ku utru kusas pa bias, ku limarias, ku kusas di balur, fora di ofertas ke da pa templu.

⁷ Rei Siru tira kusas ku pertensiba kasa di SIÑOR, ku Nabukodonosor tisiba di Jerusalen, i pui na kasa di si deusis.

⁸ Siru, rei di Persia, manda Mitredat, si tisoreru, pa i tira elis; kila fasi konta delis, i ntrega elis na mon di Sesbazar, ŝef di Judá.

^9-10 Es i lista di ki kusas: Basias di uru 30 Basias di prata 1.000 Fakas 29 Tiẑelas di uru 30 Tiẑelas di prata 410 Utru vasus 1.000

¹¹ Tudu vasus di uru ku di prata i 5.400. Sesbazar leba elis tudu oca ku kilis ku seduba katibus na Babilonia sai di la, e bai pa Jerusalen.