Eklesiastis 8 - BIBLIA - traduson antigu in Krioulo

¹ Kin ku sedu suma omi jiru? Kin ku pudi splika sintidu di kusas? Jiresa di omi ta pui si rostu kontenti, i ta muda ruñesa di si rostu.

No dibi di obdisi rei

² Obdisi ordi di rei, pabia di purmesa ku bu fasi dianti di Deus.

³ Ka bu ten dipresa pa sai dianti di rei, nin ka bu difindi pa un kusa mau, pabia el i ta fasi konformi i misti.

⁴ Suma ku palabra di rei ten otridadi, kin ku na puntal: “Ke ku bu na fasi?”

⁵ Kil ku ta obdisi ordi i ka ta pasa nin koldadi mal. Algin ku korson jiru ta sibi tempu ku manera di fasi un kusa,

⁶ pabia kada kusa ku algin misti fasi i ten si tempu sertu, ku manera ki dibi di fasidu, nin si kasabi di omi na pesa riba del.

⁷ Suma i ka ten omi ku kunsi futuru, ningin ka pudi kontal ke ku na bin sedu.

⁸ I ka ten omi ku ten puder riba di si folgu pa guardal, nin i ka ten puder riba di dia ki na muri. Suma ku ningin ka ta largadu na tropas na tempu di gera, asin ku malvadesa ka ta larga kil ku ta fasi mal.

Justus ku maus

⁹ N oja es tudu, oca ku N pui sintidu na tudu kusas ku fasidu na mundu. I ten tempu ku omi ta manda riba di si kumpañer pa fasil mal.

¹⁰ Asin tambi N oja jinti mau nteradu, e bai na koba. Kilis ku ta matiba na kau sagradu e diskisidu na prasa, nunde ke fasi ben. Es tambi i bakatela.

¹¹ Suma ku kusa mau ku algin fasi i ka julgadu nin i ka kastigadu sedu, korson di omis sta tudu pruntu pa fasi mal.

¹² Nin si un omi mau fasi mal sen bias, ma inda i tene vida kumpridu, N sibi sertu kuma kusas na kuri mas diritu ku kilis ku rispita Deus, e ten medu del.

¹³ Ma kusas ka na kuri diritu ku omi mau; i ka na tene vida kumpridu, ma i na disparsi suma sombra, pabia i ka medi dianti di Deus.

¹⁴ I ten utru kusa bakatela ku ta fasidu na mundu. I ten justus ku ta risibi ke ku jinti mau dibi di risibi; i ten jinti mau ku ta risibi ke ku justus mersi. N fala kuma es tambi i bakatela.

¹⁵ Asin N na rekumenda kontentamentu, pabia omi ka tene utru kusa minjor ne mundu di ki kume, i bibi, i fika kontenti. Es pudi kumpañal na si tarbaju na dias di si vida ku Deus dal ne mundu.

¹⁶ N pui sintidu pa kunsi jiresa, pa N jubi tarbaju ku ta fasidu na mundu, pabia, nin di dia, ku fadi di noti, omi ka ta fica uju pa durmi.

¹⁷ Dipus N oja tudu ku Deus fasi. N oja kuma omi ka pudi ntindi ke ku ta fasidu ne mundu. Pa mas ku omi pui forsa pa diskubril, i ka na bin ntindil. Nin ku omi jiru fala kuma i sibi, i ka pudi sibi.