Eklesiastis 7 - BIBLIA - traduson antigu in Krioulo

Jiresa ku tulesa

¹ Bon nomi i minjor di ki ki purfumu mas bonitu; dia di mortu i minjor di ki dia ku algin padidu.

² I minjor bai kasa di cur di ki bai kasa di festa, pabia la bu pudi oja fin di tudu omis; jinti bibu dibi di pensa diritu nel.

³ Tristesa i minjor di ki ri; i ta pui rostu tristi, ma tambi i ta fasi ben pa korson.

⁴ Korson di jiru sta na kasa di cur, ma korson di tulus sta na kasa di kontentamentu.

⁵ I minjor pui sintidu ora ku algin jiru na raprindiu, te pa bu sukuta si algin tulu na ngabau ku kantiga.

⁶ Si un tulu na ri, i suma baruju di leña di fidida bas di kasarola. Es tambi i bakatela.

⁷ Na bardadi, si omi jiru na ngana jinti, i ta torna suma dudu; suku di bas ta pui korson kurumpi.

⁸ Kabantada di un asuntu i minjor di ki si kumsada. Pasensa i minjor di ki orgulyu.

⁹ Ka bu lestu ku paña raiba, pabia algin ku ta guarda raiba dentru del i tulu.

¹⁰ Nunka ka bu punta: “Ke ku manda dias ku pasa i minjor di ki es?” I ka jiresa e koldadi purgunta.

¹¹ Jiresa, suma yardansa, i bon kusa; kilis ku sta di vida e pudi purbita del,

¹² pabia jiresa i suguransa, suma ku diñeru i suguransa, ma jiresa i mas minjor, pabia i ta da vida pa kil ku tenel.

¹³ Pensa na tarbaju di Deus. Kin ku pudi filanta kusa ku Deus kumpu tortu?

¹⁴ Na dia ku kusas na kuri sabi, fika kontenti, ma na dia ku kusas na kuri mal, pensa diritu. Deus kumpu es, i kumpu ki utru tambi; asin omi ka pudi sibi ke ku na bin sedu dipus.

¹⁵ Na tudu ña vida di bakatela N oja e kusa: un justu ku muri na si justisa ku omi mau ku teneba vida kumpridu na si malvadesa.

¹⁶ Ka bu sedu justu dimas, nin ka bu sedu jiru dimas; ke ku manda bu na kaba ku bu vida?

¹⁷ Ka bu sedu mau dimas, nin ka bu sedu tulu. Kuma ku bu na muri antis di bu tempu ciga?

¹⁸ I bon pa bu pega na un, ma ka bu larga ki utru; kil ku rispita Deus i na kapli des tudu.

¹⁹ Jiresa ta pui un omi jiru mas forti di ki des ŝef di un prasa.

²⁰ Na bardadi i ka ten omi justu na mundu ku ta fasi kil ki sertu, ku nunka ka ta peka.

²¹ Ka bu pui sintidu na tudu palabra ku jinti fala, pa ka bu bin obi bu servu na fala mal di bo,

²² pabia bu sibi na bu korson kuma, manga di bias, abo propi bu fala mal di utru jinti.

²³ N punta-punta es tudu ku jiresa, N fala kuma N na sedu jiru, ma jiresa staba lunju di mi.

²⁴ Kualker kusa ku jiresa sedu, i sta lunju, i fundu dimas; kin ku na ojal?

²⁵ N rabida N pui sintidu pa punta, pa buska jiresa, pa ntindi roson, pa sibi kuma malvadesa i kusa di tulesa, tambi pa sibi kuma fasi kusas tulu i dudesa.

²⁶ N oja un kusa mas malgos di ki mortu — un minjer ku si korson i ridia ku armadilia; si mon i korenti. Algin ki bon dianti di Deus i ta kapli del, ma i ta paña kil ku ta fasi pekadu.

²⁷ Filósofu fala: “Jubi, N oja un kusa. Oca N na komparaba un kusa ku utru, pa buska sibi ke ku ten,

²⁸ N fika N na buska ma N ka diskubril; N oja un omi bon na metadi di mil, ma N ka oja nin un minjer bon na metadi di tudu minjeris.

²⁹ Es son ku N diskubri: Deus kumpu omi retu, ma omis ranja manga di komplikason.”