Eklesiastis 6 - BIBLIA - traduson antigu in Krioulo

¹ I ten utru mal ku N oja ne mundu, ku ta pesa riba di omis.

² Deus pudi da un omi manga di rikesa ku rispitu, tok nada ka faltal di tudu ki misti, ma Deus ka dal puder pa i kume di ki kusas; utru algin strañu ku bin kumel. Es tambi i bakatela; i un kasabi garandi.

³ Si un omi padi sen fiju, i tene vida kumpridu tok i na beju, si i ka na oja kontentamentu na kusas ki tene, fora di kila, si i ka nteradu ku rispitu, N oja kuma mininu ku padidu mortu i mas sortiadu di ki el.

⁴ Ki mininu, i bin amonton, i bai na sukuru; sukuru kubri si nomi.

⁵ I ka oja sol, nin i ka kunsil, ma i mas ten diskansu di ki ki omi,

⁶ mesmu ku kila vivi dus mil anu, ma i ka ten kontentamentu na kusas ki tene. Nta tudu jinti ka ta bai na mesmu kau?

⁷ Tudu tarbaju di omi i pa si boka, ma nunka i ka ta sinti kuma i farta.

⁸ Kal ki purbitu ku jiru ten riba di tulu? O koitadi ku sibi yanda na metadi di jinti, kal ki si purbitu?

⁹ I minjor pa kontenti ku kil ku bu oja di ki bu diseẑu na yanda-yanda ku kubisa. Es tambi i bakatela, suma algin ku na serka bentu.

¹⁰ Kil ku izisti i dadu ja nomi; naturesa di omi i kunsidu ja. Nin un omi ka pudi diskuti ku algin ku mas el forti.

¹¹ Mas palabras ku bu papia, menus sintidu ku sta nel; kuma ku algin ta purbita?

¹² Kin ku sibi ke ki bon pa omi ne vida, pa e puku dias ku ka bali nada, ku ta pasa suma sombra? Kin ku na konta omi ke ku na sedu ne mundu dipus di si mortu?