Eklesiastis 5 - BIBLIA - traduson antigu in Krioulo

Ka bu fasi purmesa sin pensa

¹ Toma sintidu ora ku bu na yentra na kasa di Deus. Pui sintidu mas pa obi di ki pursenta sakrifisius suma tulus, ku ka sibi si e na fasi mal.

² Ka bu turmenta na bu korson, nin ka bu janti pa yabri boka pa fala kualker palabra dianti di Deus, pabia Deus sta na seu, abo bu sta na tera; asin bu palabras dibi di sedu puku.

³ Si bu kuda ciu, bu pudi tene suñus. Si bu papia ciu, bu pudi fala palabras di tulesa.

⁴ Si bu fasi un purmesa pa Deus, ka bu tarda pa kumpril, pabia Deus ka ta kontenti ku tulus. Kil ku bu purmiti, kumpril.

⁵ I minjor bu ka fasi purmesa te pa bu purmiti, bu ka kumpril.

⁶ Ka bu seta pa bu boka lebau na pekadu, nin ka bu fala dianti di saserdoti kuma bu yara, manera ku bu fasi purmesa. Pabia di ke ku bu na pui Deus paña raiba ku bu palabras, tok i bin kaba ku tarbaju di bu mon?

⁷ Suma na manga di suñu i ten kusas ku ka bali, asin tambi na manga di palabra, ma abo, rispita Deus.

Rikesa ka ten balur

⁸ Si bu oja na un reẑion kuma jinti na kalka pobris, e na roba elis se diritu na kau di justisa, ka bu dimira un kusa suma es; un funsionariu tene si ŝef ku na jubi pa el; riba delis dus i ten utru ŝef mas altu inda.

⁹ Purbitu di tera i pa tudu jinti; te rei ta purbita di lugar di labur.

¹⁰ Kil ku gosta di diñeru, nunka diñeru ka ta cigal; kil ku gosta di rikesa, si rindimentu nunka ka ta cigal. Es tambi i bakatela.

¹¹ Nunde ku rikesa na aumenta, asin ku kumeduris tambi na aumenta. Kal purbitu ku si dunu ta ten, si i ka pa jubi ku si uju?

¹² Tarbajadur ta durmi sabi, nin si i kume ciu o i kume puku, ma omi riku tene kusas ciu tok i ka ta pudi durmi.

¹³ I ten un mal ku N oja ne mundu, ku ta kausa duensa, ku sedu rikesa ku si dunu rakada pa si propi danu,

¹⁴ pabia ki rikesa pudi pirdi pa kualker mufunesa; si fiju ka na bin fika ku nada.

¹⁵ Suma ki sai nun na bariga di si mame, asin ki na riba nun. I ka na tene nada di si tarbaju ki pudi leba na mon.

¹⁶ Tambi es i utru mal: suma ki bin, asin ki na bai. Ke ki bali pena pa i tarbaja pa bentu?

¹⁷ Na tudu si vida i ta kume na sukuru, ku fadiga, ku duensa ku raiba.

¹⁸ Es i kusa ku N oja, kuma i bon, i bonitu pa omi kume, i bibi, i kontenti ku tudu kil ki tarbaja pa el ne mundu duranti ki puku dias di vida ku Deus dal, pabia es i si sorti.

¹⁹ Ora ku Deus da un omi manga di rikesa, ku puder pa kumel, pa i seta si sorti, tambi pa i disidi sta kontenti ku si tarbaju; es i kusa ku Deus dal.

²⁰ I ka na pensa ciu na dias di si vida, pabia Deus incil ku alegria na korson.