Eklesiastis 4 - BIBLIA - traduson antigu in Krioulo

Kanseras di vida

¹ Dipus N rabida, N jubi pa tudu injustisa ku ta fasidu ne mundu. N oja larmas di kilis ku kalkadu, ku ka tene kin ku na konsola elis. Forsa staba na ladu di kilis ku na kalka elis; e ka teneba judadur.

² Asin N fala kuma kilis ku muri ja e mas sortiadu di ki kilis ku bibu inda.

³ Ma minjor di tudu i kil ku ka padidu inda, ku ka oja mal ku ta fasidu ne mundu.

⁴ N nota kuma i nveẑa di si kumpañer ku ta pui omi tarbaja ciu ku jitu pa i pudi ngaña. Es tambi i bakatela, suma algin ku na serka bentu.

⁵ Tulu ta kursa mon; kurpu ta kaba ku el.

⁶ Minjor bu tene son un mon incidu, bu ten pas, te pa bu tene dus mon incidu, bu na tarbaja suma bu na serka bentu.

⁷ N torna oja utru kusa ne mundu ki bakatela.

⁸ I ten un omi ku sta el son, ku ka tene fiju nin ermon; i ta tarbaja sin para, pabia i ka ta farta junta rikesa. I ka ta punta: “Kin ku N na tarbaja pa el, manera ku N ta nega diskansa pa N goza ña vida?” Es tambi i bakatela, i un vida kansadu.

⁹ I minjor bo sedu dus di ki un son, pabia tarbaju ta mas rindi.

¹⁰ Si un kai, utru pudi lantandal, ma koitadi di kil ku sta el son. Si i kai, i ka na tene kin ku na lantandal.

¹¹ Tambi si dus durmi juntu, e ta kenta ŋutru, ma un son, kuma ki na kenta?

¹² Si algin bin pa ataka, i pudi ngaña un algin son, ma dus pudi risistil. Un korda di tris fiu i kansadu sapa.

¹³ Un joven koitadi ku sedu jiru i minjor di ki rei beju ku ka ten juisu, ku ka ta seta konsiju.

¹⁴ Un omi pudi sai na kalabus pa bai rena, nin si i padidu na koitadesa na si tera.

¹⁵ N oja tudu jinti ku vivi ne mundu, ku yanda ku ki joven ku na toma lugar di rei.

¹⁶ I pudi manda riba di manga di jinti ku ka pudi kontadu, ma kilis ku bin tras del e ka na kontenti ku el. Na bardadi es tambi i bakatela, suma kin ku na serka bentu.