Eklesiastis 3 - BIBLIA - traduson antigu in Krioulo

Tudu kusa ten si tempu markadu

¹ Tudu kusa ten si ora markadu; i ten un tempu sertu pa tudu kusa ku ta fasidu bas di seu.

² I ten tempu di padidu, tempu di muri; tempu di paranta, tempu di rinka kil ku parantadu;

³ tempu di mata, tempu di kura; tempu di durba, tempu di kumpu;

⁴ tempu di cora, tempu di ri; tempu di miskiña, tempu di baja;

⁵ tempu di pajiga pedra, tempu di juntal; tempu di barsa, tempu di lunjusi;

⁶ tempu di buska, tempu di para buska; tempu di rakada, tempu di bota fora;

⁷ tempu di rumpi, tempu di kusi; tempu di kala boka, tempu di papia;

⁸ tempu di ama, tempu di odia; tempu di gera ku tempu di pas.

⁹ Kal purbitu ku tarbajadur ten na si tarbaju?

¹⁰ N nota kargu pisadu ku Deus pui riba di omi, pa kansal.

¹¹ I fasi tudu kusa bonitu pa si tempu sertu; tambi i da omi sintidu di kil ku pasa ku kil ku na bin, ma omi ka pudi ntindi ke ku Deus fasi disna di kumsada te na kabantada.

¹² N rapara kuma i ka ten kusa minjor pa elis mas di ki pa e fika kontenti, e fasi ben nkuantu e sta ku vida.

¹³ I bon tambi pa tudu omi kume, i bibi, i goza ke ki tarbaja; es i kusa ku Deus dal.

¹⁴ N sibi kuma tudu ku Deus fasi i na tarda pa sempri. Nada ka pudi buridu riba del, nada ka pudi rapatidu nel. Deus ta fasil pa jinti pudi rispital.

¹⁵ Kil ku sedu gosi i seduba ja. Kil ku na bin sedu tambi, i seduba ja. Deus ta coma kil ku pasa pa i bin mas.

Injustisa na mundu

¹⁶ N rapara utru kusa ne mundu li: Na kau di julgamentu, nunde ku justisa dibi di fasidu, maldadi sta la.

¹⁷ N fala na ña sintidu kuma Deus na julga kil ki justu ku kil ki mau, pabia i ten tempu markadu pa kada planu, ku kada kusa ku na fasidu.

¹⁸ N bin rapara kuma Deus na proba omis, pa e pudi oja kuma e ka sedu minjor di ki limarias.

¹⁹ Kil ku ta sedu ku omis, i ta sedu tambi ku limarias. Mesmu kusa ta pasa ku elis tudu. Manera ku un ta muri, asin ku utru ta muri; tudu tene mesmu folgu. Omi ka ten nin un purbitu mas di ki limaria; elis tudu, se vida i bakatela.

²⁰ E na bai tudu pa un lugar son; tudu elis i reia, e na riba pa reia.

²¹ Kin ku sibi si spiritu di omis na subi pa riba, spiritu di limarias na bai bas di con?

²² Asin N oja kuma i ka ten kusa minjor di ki omi fika kontenti na si tarbaju, pabia es i si sorti. Kin ku na ribantal pa i oja kil ku na sedu dipus del?