Eklesiastis 2 - BIBLIA - traduson antigu in Krioulo

Rikesa ka ten balur

¹ N fala na ña sintidu kuma N na bin goza vida, pa N sibi ke ki kontentamentu, ma N oja kuma kila tambi i bakatela.

² N fala: “Pa ri i tulesa; kontentamentu tambi, pa ke ki sirbi?”

³ Oca ku N na buska inda jiresa, N disidi miti na biñu, N pega vida di tulesa, pa N jubi kal ki minjor kusa ku omis pudi fasi na se puku tempu di vida bas di seu.

⁴ N kumsa ku garandi obras; N kumpu kasas, N paranta ortas di uva, tudu pa mi.

⁵ N fasi ortas ku jardins, N paranta nelis tudu koldadi pe di fruta.

⁶ N koba fontis pa regua ña laburis, nunde ku tudu ki pe di fruta na lanta bonitu.

⁷ N kumpra katibus macu ku femia, ku kilis tambi ku padidu na ña kasa. N teneba garandi koral di bakas ku karnel, mas di ki tudu ku staba na Jerusalen antis di mi.

⁸ N junta tambi prata ku uru pa mi, ku rikesas di reis ku pruvinsias. N ranja kantaduris macu ku femia, ku tudu koldadi instrumentu di musika — tudu ku omis pudi misti.

⁹ N torna garandi, mas di ki tudu kilis ki tenba antis di mi na Jerusalen. Ña jiresa tambi i fika sempri ku mi.

¹⁰ Tudu ku ña uju oja, i misti, N ka nega ranjal; N ka tuji ña korson kualker kusa sabi. N fika kontenti ku tudu ña tarbaju; ki kontentamentu ku sedu pagu di tudu ku N fasi.

¹¹ N jubi tudu ki obras ku ña mon fasi, ku tudu tarbaju ku N kansa na fasi; N oja kuma tudu i bakatela, suma algin ku na serka bentu. I ka tenba nin un purbitu bas di sol.

¹² Ke ku nobu rei pudi fasi si i ka kil ku utrus fasiba ja? Dipus N rabida N na pensa na jiresa ku tulesa ku dudesa.

Jiresa ku tulesa, tudu i bakatela

¹³ N oja kuma jiresa i mas bon di ki tulesa suma ku lus i mas minjor di ki sukuru.

¹⁴ Jiru tene uju na si kabesa; tulu ta yanda na sukuru, ma N bin rapara kuma mesmu kusa ta pasa ku elis tudu.

¹⁵ N fala na ña sintidu: “Kusa ku kontisi ku tulu, el tambi ku na kontisi ku mi. Ke ku N ngaña manera ku N buska jiresa?” Dipus N fala kuma es tambi i bakatela.

¹⁶ Omi jiru ka na lembradu mas di ki tulu; na dias ku na bin, elis tudu e na diskisidu ntidu. Suma ku jiru na muri, asin tambi ku tulu na muri.

¹⁷ Asin N bin nfastia vida, pabia tarbaju ku ta fasidu bas di sol, pa mi i kansadu ba. Sin, tudu i bakatela, suma algin ku na serka bentu.

Tarbaju i bakatela

¹⁸ N nfastia tudu ku N tarbaja pa el bas di sol, suma ku N na bin disal pa utru ku na bin bin ña tras.

¹⁹ Kin ku sibi gora si i na sedu jiru o tulu? Ma el ku na ten konta di tudu ku N tarbaja pa el bas di sol, ku tudu ku N ngaña ku jiresa. Es tambi i bakatela.

²⁰ Asin N bin pirdi speransa di tudu tarbaju ku N kansa ku el bas di sol,

²¹ pabia un omi pudi fasi tarbaju ku jiresa, kuñisimentu ku jitu, ma i ta bin disal na mon di utru ku ka tarbaja nel. Es tambi i bakatela, i garandi kasabi.

²² Kal ki purbitu ku un omi ten di tudu si tarbaju ku sintidu kansadu ki luta ku el bas di sol?

²³ Tudu si vida i son dur ku tarbaju ku kasabi; te di noti si sintidu ka ta diskansa. Es tambi i bakatela.

²⁴ Minjor kusa ku omi pudi fasi i kume, i bibi, i goza kusa ki ngaña ku si tarbaju, ma N oja kuma es tambi i bin di mon di Deus,

²⁵ pabia, sin el, kin ku pudi kume, o kin ku pudi oja kontentamentu?

²⁶ Deus ta da jiresa, kuñisimentu ku kontentamentu pa omi ki bon si dianti, ma kil ku ta fasi pekadu, Deus ta pul pa i tarbaja, i junta, i ruma, pa i pudi da pa kin ku ta pui Deus kontenti. Es tambi i bakatela, i suma algin ku na serka bentu.