Eklesiastis 11 - BIBLIA - traduson antigu in Krioulo

Ke ku omi jiru ta fasi

¹ Mbarka bu prudutu, bu mandal pa utru tera; dipus di manga di tempu bu na oja lukru.

² Rapati bu nogos ku seti o oitu, pabia bu ka sibi kal mal ku na bin na mundu.

³ Si arvuri kai na sul o na norti, kau ki kai, la ki ta fika. Ora ku nuven inci ku yagu, i ta darma cuba na tera.

⁴ Kil ku na oja pa bentu, nunka i ka na sumia; kil ku na jubi nuvens, nunka i ka na kebra.

⁵ Suma ku bu ka sibi kal ki kamiñu di bentu, nin kuma ku os ta forma na bariga di preñada, asin tambi bu ka ntindi tarbaju di Deus, kil ku fasi tudu kusas.

⁶ Sumia bu simentera parmaña; di tardi ka bu diskansa bu mon, pabia bu ka sibi kal ku na padi, es o kila la, o si tudu dus na bali na mesmu.

⁷ Lus i bonitu; i sabi si no pudi oja sol.

⁸ Si un omi vivi manga di anu, i dibi di kontenti nel. Tambi i dibi di lembra di dias di sukuru ku na bin, pabia i na ciu. Tudu ku na bin sedu i bakatela.

Konsiju pa jovens

⁹ Joven, fika kontenti na bu nobresa, bu goza dias di bu juventudi. Yanda na kamiñu di bu korson, ku kil ku bu uju misti, ma ka bu diskisi kuma Deus na julgau pabia di tudu ki kusas.

¹⁰ Asin, lunjusi miskiñu di bu korson, bu libra bu kurpu di purblemas, pabia juventudi ku kirsimentu di forsa i bakatela.